Մենք կարևորում ենք հանրային կապերը. Նաիրա Մարգարյան

Հայկական Փի Ար ասոցիացիան ՀՀ էկոնոմիկայի նախարարության տարբեր ստորաբաժանումների 30 աշխատակիցների համար կարողությունների զարգացման դասընթաց իրականացրեց: Պետական գերատեսչություններում ներքին և արտաքին հաղորդակցության կազմակերպման, նամակագրության սկզբունքների, գրավոր և բանավոր խոսքի, հրապարակային ելույթի առանձնահատկությունները մասնակիցներին ներկայացրեցին Հայկական Փի Ար ասոցիացիայի նախագահ, ԵՊՀ ժուռնալիստիկայի ֆակուլտետի դոցենտ, բ.գ.թ. Աստղիկ Ավետիսյանն ու փոխնախագահ, Հայաստանի PR դպրոցի համակարգող, միջազգային ուսուցանող Արման Գրիգորյանը:

Դասընթացը կազմակերպվեց «Եվրոպական միության «ԵՄ-ն՝ Բիզնեսի համար» նախաձեռնության մաս կազմող և Գերմանիայի միջազգային համագործակցության ընկերության կողմից իրականացվող «Աջակցություն ՓՄՁ զարգացմանը Հայաստանում» ծրագրի շրջանակում:

Հայկական PR ասոցիացիայի նախագահ Աստղիկ Ավետիսյանը կարևորելով նման դասընթացները, նշեց, որ «պետական գերատեսչությունների հետ նմանատիպ ծրագրեր կազմակերպելը նպաստում է, որ աշխատակազմը շարունակաբար տիրապետի նոր գործիքների և տեխնոլոգիաների, հաղորդակցման հմտությունների: Ներքին և արտաքին հաղորդակցման ռազմավարական գրագետ մոտեցումն ուժեղացնում է տվյալ գերատեսչությանը: Այս պարագայում ՀՀ Էկոնոմիկայի նախարարությունն է առաջնագծում»:

ՀՀ Էկոնոմիկայի նախարարի տեղակալ Նաիրա Մարգարյանն էլ ընդգծում է, որ «հասարակության, շահառուների, աշխատակիցների հետ փոխհարաբերությունները առաջնային լուծման խնդիրներ են, յուրաքանչյուր աշխատակցի իրականացրած գործունեություն և վարքագիծ ձևավորում է գերատեսչության կերպարը: Մենք կարևորում ենք հանրային կապերը»: