Search

Ջրաշենում՝ Խաղողօրհնեք


Լոռու մարզի Ջրաշեն գյուղում` «Մայրություն» հուշարձանի մոտ, տեղի ունեցավ ավանդական դարձած Խաղողօրհնեքի արարողությունը, Սպիտակի և տարածաշրջանի հոգևոր հովիվ Տեր Օվսե քահանա Հովհաննիսյանն օրհնեց տարվա ողջ բերքն ու բարիքը և ապա խաղողի օրհնված ողկույզները բաժանվեցին ժողովրդին: Նախաձեռնության հեղինակը Երիտասարդական ակումբների դաշնության նախագահ, ԳԱԱ միջազգային գիտակրթական կենտրոնի գիտքարտուղար, ֆիզմաթ գիտությունների թեկնածու Ատոմ Մխիթարյանն է: Հայ Առաքելական եկեղեցին Աստվածածնի Վերափոխման տոնը նշում է օգոստոսի 15-ին մոտ կիրակի օրը: Այն հինգ տաղավար տոներից չորրորդն է, և Տիրամորը նվիրված տոներից ամենահինը Այս օրն առավելապես ընդգծվում է որդիական սիրո ու մայրական զուսպ սպասման ու հավատի հանգամանքը: Հայ Եկեղեցին դարեր շարունակ խորին հարգանք և երկյուղածություն է տածում Աստվածամոր հանդեպ` շեշտելով Աստծո մայր լինելու հանգամանքը, մաքրակենցաղությունը, անօրինակ խոնարհության ոգին, առաքինի վարքն ու նվիրվածությունը: Ջրաշենցի Ա. Մխիթարյանի մոր՝ Հրածին Հովհաննիսյանի հիշատակին կանգնեցված «ՄԱՅՐՈՒԹՅՈՒՆ» հուշարձանը բնորոշում է բոլոր մայրերի ազնիվ ու անաղարտ կերպարը, այն հավատավոր մոր, ընտանեկան սրբության պահապանի մարմնացումն է: Հուշարձանի հեղինակը Երևանի գեղարվեստի պետական ակադեմիայի դոցենտ, քանդակագործ Էմին Պետրոսյանն է: Շուրջ երկու մետր բարձրությամբ, տրավերտինից ու բազալտից քանդակված հուշարձանը գյուղի կենտրոնում՝ երկրաշարժից ավերված դպրոցի տեղում տեղադրվել է չորս տարի առաջ հենց սբ. Աստվածածնի վերափոխման տոնի օրը: Այս տարի ջրաշենցիներին ու հյուրերին ողջունելու էին եկել Սպիտակի «Վերածնունդ» և Ջրաշենի «Փարոս» պարային համույթները, Սպիտակի Ջիվանու անվան աշուղական դպրոցի սաները, պատանի դոլահար Վլադիմիր Մխիթարյանը: Ներկաները ոգևորված էին պատանիների և երիտասարդների կատարումներով: Նրանց կատարումները ոգևորիչ էին ներկաների համար: -Սա մեր երեխաների համար լավ առիթ է ներկայանալու, ցուցադրելու սովորածն ու ոգևորվելու առաջիկա մրցույթներին ու փառատոներին մասնակցելու համար, - ասաց Սպիտակի մշակույթի տան նորանշանակ տնօրեն Հերմինե Դարչինյանը: -Շատ ողջունելի է, որ մեր միօրինակ առօրյան յուրաքանչյուր տարի այս օրերին լավ իմաստով խանգարվում է Ատոմի նախաձեռնությամբ: Եկել եմ հարևան Լեռնավանից՝ կիրակի օրը լավ ժամանակ անցկացնելու, առնչվելու մեր մշակույթին, ունկնդրելու ազգայինավանդական երգն ու պարը - նշեց Լեռնավանի համայնքապետարանի աշխատակից Ժաննա Այվազյանը: -Ամեն տարի, չնայած արձակուրդներին, դասարանիս աշակերտներին կազմակերպում և բերում եմ Մայրություն հուշարձանի մոտ՝ մասնակցելու Խաղողօրհնեքի արարողությանը, մշակութային միջոցառումներին: Սա յուրօրինակ հայրենասիրության դաս է աշակերտներիս համար, - ընդգծում է Ջրաշենի դպրոցի ուսուցչուհի Տաթև Բադիկյանը: Վարդան Մամիկոնյանի հետնորդների ու Մամիկոնյան տոհմի ժառանգների գյուղում՝ Ջրաշենում (նախկինում՝ Վարդանավան, Վարդնավ) ավանդույթ դարձած այս միջոցառումը լավ առիթ է նաև համայնքի բնակիչներին հուզող խնդիրների բարձրաձայնման, նոր նախաձեռնությունների դրսևորման համար. այն դարձել է հանրային քննարկումների հարթակ, որը շատ ուրախալի է, քանզի գյուղ այցելելու առիթը բաց չեն թողնում այլ բնակավայրերում ապրող բազմաթիվ ջրաշենցիներ: Ի դեպ, Խաղողօրհնեքի արարողությունից առաջ Երիտասարդական ակումբների դաշնության «Մաքուր երկիր» բնապահպանական ակումբի անդամները, գյուղի դպրոցականների հետ մաքրեցին պուրակն ու կոչ արեցին չաղտոտել տարածքը: #Խաղողօրհնեք #Ջրաշեն #Տեր Օվսե քահանա Հովհաննիսյան #Ատոմ Մխիթարյան #Ջրաշեն #Լոռու մարզ #Մայրություն հուշարձան


Արա Այվազյանի հանդիպումը Արցախի ԱԳ նախարար Դավիթ Բաբայանի հետ

Արտակ Ապիտոնյանի աշխատանքային այցը Իրաքյան Քուրդիստան

Էկոնոմիկայի նախարարությունը նոր տնտեսական քաղաքականություն է մշակում. Վահան Քերոբյան

Նախագահ Արմեն Սարգսյանը հանդիպել է Ազգային ժողովի նախագահ Արարատ Միրզոյանի հետ

Պուտինը ՌԴ ԱԽ անդամների հետ քննարկել է Լեռնային Ղարաբաղի շուրջ իրավիճակը

Այս փուլում Արցախում զարգացնել տուրի՞զմը, թե՞ հասնել կայուն խաղաղության. Զախարովա

Սա ևս մեկ պատճառ է, որ իրավապահները սկսեն ստուգել Արցախը հանձնելու տարբերակը. Զոհրաբյան

ԼՐԱՀՈՍ
practice cover.png
ԽՄԲԱԳՐՈՒԹՅՈՒՆ
  • Facebook
  • YouTube
ԼՐԱՏՎՈՒԹՅՈՒՆ

Կայքի բոլոր իրավունքները պաշտպանված են: Կայքից մեջբերումներ անելիս ակտիվ հղումը Anews.am-ի պարտադիր է: 

 

Հայտարարությունների և գովազդների բովանդակության համար կայքը պատասխանատվություն չի կրում: