Արփինե Հովհաննիսյանը հաղթեց Հայկական PR մրցանակաբաշխության տարվա հրապարակային գործիչ անվանակարգում

Կայացավ «Հայկական PR մրցանակաբաշխություն 2021»-ը, որն իրականացվել է «Հայկական Փի Ար ասոցիացիայի» նախաձեռնությամբ: PR մրցանակաբաշխության հետազոտական խումբը քանակական հետազոտության մեթոդաբանությամբ յուրաքանչյուր անվանակարգում առանձնացրել է լավագույն եռյակը: Արդյունքում տարվա հրապարակային գործիչ անվանակարգում ընտրվել են Արփինե Հովհաննիսյանը, Գեղամ Մանուկյանը, Տիգրան Աբրահամյանը: Հայկական PR մրցանակաբաշխության 2021-ի տվյալ անվանակարգում հաղթող ճանաչվեցին երկուսը` ՀՀ պետական և քաղաքական գործիչ, իրավաբան, ՀՀ Արդարադատության նախկին նախարար Արփինե Հովհաննիսյանը և «Հենակետ» վերլուծական կենտրոնի ղեկավար, Արցախի նախագահի անվտանգության հարցերով նախկին խորհրդական Տիգրան Աբրահամյանը: Լավագույնի անունը հայտարարելու համար բեմ հրավիրվեց նախորդ PR մրցանակաբաշխության նույն անվանակարգում հաղթող, ՀՀ մարդու իրավունքների առաջին պաշտպան Լարիսա Ալավերդյանը, ով իր հուզմունքը կիսեց հանդիսատեսի հետ: Տիկին Ալավերդյանի խոսքով, ցավալի ու ծանր իրողություններ տեղի ունեցան և դժվար ենք վերագտնում ինքներս մեզ, բայց կյանքը շարունակվում է ու նրբորեն պետք է դուրս գալ այս իրավիճակից: «Մի աչքը արտասուքով լի, մյուս աչքը ժպտալով մենք այստեղ հավաքվել ենք և կարծում եմ, դա մեզ պետք է ուժ տա»,- նշեց նա:

Ըստ Ալավերդյանի` մենք չպետք է հավատանք, որ սա մեր մայրամուտն է:

«Այստեղ սարեր կան սարերի վրա,

Եվ ձորերի մեջ ձորեր կան մթին,

Ես չեմ հավատում իմ մայրամուտին,

Այստեղ սարեր կան սարերի վրա»,- ասաց Լարիսա Ալավերդյանը, հիշելով Համո Սահյանի հայտնի խոսքերը:

Արփինե Հովհաննիսյանը շնորհակալություն հայտնեց «Հայկական Փի Ար ասոցիացիային», նրա կողմից գնահատվելու համար և առանձնացրեց հանրային հաղորդակցության կամ հանրության հետ երկխոսելու իր ձևաչափը:

«Առաջին չափորոշիչը` չմոռանալ, ովքեր զոհվեցին, ինչու զոհվեցին, թույլ չտալ մոռանալ, որպեսզի արժանի դառնան այն զոհողությանը, որ տեղի ունեցավ նրանց կողմից: Երկրորդ չափանիշը` ազնվություն, դա այս փուլում առավել, քան կարևոր է: Մենք մի փոքր բարության և հանդուրժողականության կարիք ունենք: Ես իմ հանրային հաղորդակցության կամուրջը հանրության հետ ուզում եմ կառուցել հենց այդպես: Մյուս չափանիշը ներդաշնակությունն է ինքս իմ խղճի, համոզմունքների հետ»,- կարևորեց Արփինե Հովհաննիսյանը:

Հայկական PR մրցանակաբաշխության նպատակն է արձանագրել հանրային կապերի ոլորտի ձեռքբերումները, հնարավորինս զարգացնել և հանրայնացնել Հայաստանում գրագետ հաղորդակցության մշակույթի կարևորությունը, նպաստել PR մասնագետների ակտիվ դերակատարությանը քաղաքական-հասարակական գործընթացներում, հանրային կյանքում:

PR մրցանակաբաշխության արդյունքները գիտական հիմք ունեն։ Հայկական Փի Ար ասոցիացիայի հետազոտական խումբն իրականացրել է հարցումներ թիրախային խմբերի (PR փորձագետներ, ԶԼՄ ներկայացուցիչներ) հետ, կանոնավոր մշտադիտարկման են ենթարկվել գերատեսչությունների աշխատանքն ու պետական, քաղաքական, հանրային գործիչների գործունեությունը։

Գոհար Սարգսյան