WhatsApp-ի միջոցառումներին հնարավոր կլինի արձագանքել նաև առանց հավելվածի

Թեմատիկ լուսանկար

WhatsApp-ը թարմացնում է միջոցառումների կազմակերպման գործիքները․ հրավերի հղումն ստացողը կկարողանա դիտել մանրամասներն ու հայտնել մասնակցության մասին նույնիսկ առանց WhatsApp-ի հաշվի և հավելվածը ներբեռնելու։ Meta-ն փոփոխությունները ներկայացրել է նոյեմբերի 5-ին։

Կազմակերպիչը կարող է ստեղծել միջոցառում, ավելացնել շապիկի լուսանկար և տարածել հղումը։ Այս մոտեցումը թույլ է տալիս մեկ հրավերով հասնել նաև այն մարդկանց, որոնք տվյալ հաղորդագրությունների հավելվածից չեն օգտվում։

Միջոցառումների միասնական բաժին

Նոր Events Home բաժնում հնարավոր կլինի ստեղծել անհատականացված հրավերներ, հետևել մասնակցության պատասխաններին և սահմանել հիշեցումներ։ Կլինի նաև ուղեկցող հյուրի մասնակցությունը նշելու հնարավորություն։

Ըստ ընկերության՝ կարգավորումներից Events բաժինն ընտրելիս մեկ տեղում կերևան անցած և առաջիկա միջոցառումները՝ թե՛ օգտատիրոջ կազմակերպածները, թե՛ ստացած հրավերները։

Գաղտնիություն և հասանելիություն

Meta-ի ներկայացմամբ՝ հեռախոսահամարը չի ցուցադրվի անծանոթ հյուրերին։ Հաշիվ չունեցող հյուրերը միջոցառման հասցեն կտեսնեն միայն մասնակցության պատասխանը ներկայացնելուց հետո։ Ընկերությունը նշում է, որ անձնական հաղորդագրություններն ու զանգերը շարունակում են պաշտպանվել ծայրից ծայր գաղտնագրմամբ։

Թարմացումը ներդրվում է աստիճանաբար՝ առաջիկա շաբաթներին։ Հետևաբար նոր գործիքների բացակայությունը տվյալ հաշվում դեռ չի նշանակում, որ դրանք ընդհանրապես հասանելի չեն լինելու։

Պաշտոնական հայտարարությունը