Տասնյակ ոստիկաններ դիմումներ են գրում, ուզում են դուրս գալ աշխատանքից. Մամիջանյան

Տասնյակ ոստիկաններ դիմումներ են գրում, ուզում են դուրս գալ աշխատանքից, իրենց պատասխանում են՝ խնդրում ենք՝ դուրս մի եկեք աշխատանքից, ձեզ էլ չենք ուղարկելու ցույցերի մասնակցելու: Այս մասին, այսօր՝ մայիսի 13-ին, Կառավարության 3-րդ մասնաշենքի մոտ «Դիմադրության» շարժման հավաքի ժամանակ նշեց ԱԺ «Պատիվ ունեմ» խմբակցության պտգամավոր Հայկ Մամիջանյանը:

«Իբր լուծում են գտել: Հիմա ուզում եմ, որ ինքը լավ լսի ու ականջին օղ անի՝ Նիկոլ չկա»,-ասաց նա: Ներկաները միացան վանկարկմանը:

Ոստիկանության պետի առաջին տեղակալ Արամ Հովհաննիսյանը լրագրողների հետ զրույցում ասաց, որ այս պահին ոստիկանությունից հեռանալու դիմումներ չկան. «Այս պահի դրությամբ բացառում եմ, որ նման բան լինի»,-ասաց նա:

«Հայաստան» խմբակցության պատգամավոր Արծվիկ Մինասյանն էլ արձագանքեց. «Մի բացառեք, մենք այստեղ կանգնած ենք, կարող է հիմա մեկը դիմումը գրել է»:

Նշենք, որ այս պահին «Դիմադրության» շարժման երթի մասնակիցները շրջափակել են Կառավարության 3-րդ մասնաշենքի բոլոր մուտքերը: