Վրաստանը Հայաստանից տեղափոխել է կորոնավիրուսով վարակված իր 2 քաղաքացուն
Վրաստանի առողջապահության նախարարությունը տեղեկացնում է, որ Արտակարգ իրավիճակների և անհետաձգելի օգնության համակարգման կենտրոնի անձնակազմը Հայաստանից տեղափոխել է Վրաստանի երկու վարակակիր քաղաքացիների: «Գռուզիա օնլայն»-ը փոխանցում է, որ Թբիլիսիի ինֆեկցիոն հիվանդանոցի տնօրեն Մարինա Էզուգբայան նշել է՝ իրենց հիվանդանոց են ընդունել բեռնատար մեքենաների երկու վարորդի, որոնց մոտ կորոնավիրուսի առկայությունը հաստատվել է Հայաստանում: Նա տեղեկացրել է, որ վարորդների առողջական վիճակը կայուն է և ամենայն հավանականությամբ նրանք շուտով կառողջանան:
«Նրանց առողջական վիճակը ծանր չէ: Նրանք հիվանդ են արդեն 9-10 օր: Եթե 10 օրվա ընթացքում չկա հիվանդության զարգացում, ապա որպես կանոն նման հիվանդների մոտ առողջական վիճակը կայուն է մնում: Այս երկու հիվանդները իմ նշած փուլում են»,-ասել է նա:
Առողջապահության նախարարությունը ԱԳՆ-ի հետ քաղաքացիներին վերադարձրել է հայրենիք բուժումը շարունակելու համար:
Comments