Սերբիայում Կոսովոյի հետ բանակցությունների դեմ բողոքի երթ է կազմակերպվել

Կիրակի օրը հարյուրավոր ցուցարարներ երթ են անցկացրել Բելգրադում՝ բողոքելով Սերբիայի եւ Կոսովոյի միջեւ կապերը վերականգնելու Արեւմուտքի ծրագրի դեմ, հաղորդում է Reuters լրատվական գործակալությունը: Ինչպես նշում է գործակալությունը, երթին հիմնականում մասնակցել են սերբ ազգայնականներն ու ուղղափառ քրիստոնյաները։ Շատ սերբեր Կոսովոն, որտեղ գտնվում են սերբ ուղղափառ հավատքի գլխավոր եկեղեցիներն ու վանքերը, համարում են սերբ ազգի սիրտը: Սերբ ազգայնականները, ովքեր նույնպես ցանկանում են սերտ կապեր հաստատել Սերբիայի վաղեմի դաշնակից Ռուսաստանի հետ, քննադատել են նախագահ Ալեքսանդր Վուչիչին՝ Կոսովոյի հետ Արեւմուտքի աջակցությունը վայելող գործարքի շուրջ բանակցություններում նրա ունեցած դերի համար: Փետրվարի 27-ին Վուչիչը եւ Կոսովոյի վարչապետ Ալբին Կուրտին պայմանականորեն պայմանավորվել են հարաբերությունների կարգավորման մասին համաձայնագրի շուրջ, սակայն չեն ստորագրել այն։ Սերբական ուղղափառ եկեղեցին կազմել է աղոթք, որը կտեւի մինչեւ Սուրբ Զատիկ, սակայն չի աջակցել երթին, իսկ հոգեւորականները մասնակցություն չեն ցուցաբերել։ Կոսովոն, որտեղ մեծամասնությունը էթնիկ ալբանացիներ են, անկախություն է հռչակել 2008 թվականին՝ սերբական տիրապետությանը վերջ տալու համար մղվող պատերազմից մոտ մեկ տասնամյակ անց: Սակայն Սերբիան դեռեւս Կոսովոն համարում է իր սեփական տարածքը, եւ բռնության բռնկումները մեծացնում են հակամարտությունների վերադարձի վախը: Սերբիայի եւ Կոսովոյի ղեկավարները մարտի 18-ին կրկին կհանդիպեն ԵՄ հովանու ներքո Հյուսիսային Մակեդոնիայի Օհրիդ քաղաքում՝ խաղաղության պայմանագրի իրականացման հետագա բանակցությունների համար։