Ռուսաստանը կկարողանա խուսափել դեֆոլտից ԱՄՆ-ի՝ լիցենզիայի երկարաձգումից հրաժարվելուց հետո

Դոլարային պարտատոմսերի բոլոր ռուսական թողարկումների փաստաթղթերում կա «Արժութային փոխհատուցում» կետը (Currency Indemnity), որը թույլ է տալիս օրինական վճարումներ կատարել ռուբլով, եթե պատժամիջոցները խոչընդոտում են օրիգինալ փոխարժեքով վճարմանը: Դա ռուբլով վճարելու հնարավորություն է բացում՝ առանց ռուսական դեֆոլտ հայտարարելու հիմքերի, գրում է ՌԲԿ-ն: Currency Indemnity-ն ենթադրում է, որ Ռուսաստանը կարող է վճարել դոլարից տարբեր արժույթ ունեցողին, «դատարանի որոշման, ցանկացած իրավասության դատարանի հրամանի կամ որեւէ այլ որոշման արդյունքում», գրում է պարբերականը: Փաստաթղթերի համաձայն՝ այդ դեպքում վճարման պարտավորությունը կհամարվի կատարված, եթե ներդրողը կարողանա հաջորդ հնարավոր օրվա ընթացքում այլ արժույթի ստացված գումարը փոխանակել դոլարով։ ՌԲԿ-ն նաեւ նշում է, որ եթե կոնվերտացման ժամանակ դոլարով գումարը պակաս է հասանելիքից, ապա Ռուսաստանի Դաշնությունը պարտավոր է փոխհատուցել այդ պակասը տիրոջը, ինչպես նաեւ փոխհատուցել գործարքի բոլոր ծախսերը: ՌԲԿ-ն հարցում էր ուղարկել Ֆինանսների նախարարության մամուլի ծառայություն՝ «Արժութային փոխհատուցում» հոդվածի հնարավոր օգտագործման կամ պարտավորությունների կատարման այլընտրանքային ուղիների հարցով։ Նախարարությունից հայտարարել են, որ իրենք ելնում են ներդրողների իրավունքների առավելագույն պահպանումից։ ԱՄՆ-ն ավելի վաղ չէր երկարաձգել ընդհանուր լիցենզիան, որը թույլ է տալիս Ռուսաստանին վճարումներ կատարել իր արտաքին պարտքի սպասարկման համար, որի ժամկետը լրացել է մայիսի 25-ին։ Խոսքը լիցենզիայի մասին է, որը հակառուսական պատժամիջոցներից հանել էր Ռուսաստանի Դաշնության սուվերեն պարտքի մի մասի սպասարկման վճարումները։ Դրա ժամկետն ի սկզբանե սահմանված էր մինչեւ մայիսի 25-ը, սակայն կար դրա երկարաձգման հնարավորություն։ Մայիսի 26-ին ֆինանսների նախարար Անտոն Սիլուանովը հայտարարել էր, որ Ռուսաստանը գործիք կառաջարկի, որպեսզի իր պետական ​​պարտքի բոլոր տերերը վճարումներ ստանան։