Ջո Բայդենը բացառել է «այս պահին» F-16 կործանիչների ուղարկումն Ուկրաինա

Anews
Feb 25, 2023
1 min read

Չնայած Ուկրաինայի նախագահ Վլադիմիր Զելենսկու բազմաթիվ հրապարակային կոչերին՝ ԱՄՆ նախագահ Ջո Բայդենը բացառել է «այս պահին» ժամանակակից ամերիկյան կործանիչների ուղարկումը՝ Ռուսաստանի սպասվող գարնանային հարձակումից պաշտպանվելու համար։ Այս մասին ԱՄՆ նախագահը հայտարարել է ABC News հեռուստաալիքի հաղորդավար Դեւիդ Մյուիրին։«Չե՞ք կարծում, որ այժմ Ուկրաինան F-16-ների կարիք ունի»,-հարցրել է Մյուիրը։

«Ո՛չ, նրան հիմա F-16-եր պետք չեն»,-պատասխանել է Բայդենը:

Մյուիրի այն հարցին, թե արդյոք դա նշանակում է «երբեք», Բայդենը պատասխանել է, որ հնարավոր չէ հստակ իմանալ, թե ապագայում ինչ հարկավոր կլինի ուկրաինական պաշտպանությանը։

Չնայած Բայդենը հայտարարում է, որ ԱՄՆ-ի կողմից Ուկրաինային աջակցելը «չի թուլանա այնքան ժամանակ, քանի դեռ դա անհրաժեշտ կլինի Ռուսաստանին հաղթելու համար», նա Մյուիրին ասել է, որ ամերիկացի զինվորականներն այս փուլում ավելի կարեւոր են համարում այլ աջակցություն։

«Լսեք, մենք նրանց ուղարկում ենք այն, ինչը, մեր փորձառու զինվորականների կարծիքով, այժմ անհրաժեշտ է։ Նրանց տանկեր են պետք, հրետանի ու հակաօդային պաշտպանություն է պետք, այդ թվում՝ եւս մեկ HIMARS»,-ասել է Բայդենը։

Զելենսկին վերջին մեկ տարվա ընթացքում բազմիցս խնդրել է ԱՄՆ-ին եւ եվրոպական այլ դաշնակիցներին կործանիչներ տրամադրել, բայց վերջին մի քանի ամիսների ընթացքում այս խնդրանքը դարձել է ավելի համառ: ԱՄՆ պաշտոնյաները նաեւ նշում են, որ կործանիչները կապված են ինչպես լոգիստիկ պատրաստվածության խնդիրների, այնպես էլ Ռուսաստանի հետ հարաբերություններում էսկալացիայի հնարավոր ռիսկերի հետ:

Բայդենն արդեն մերժել է այդ խնդրանքը՝ հունվարին լրագրողներին ասելով, որ ինքը F-16 չի ուղարկի Ուկրաինա, բայց Զելենսկին եւ ԱՄՆ պաշտոնյաները, ներառյալ պետքարտուղար Էնթոնի Բլինքենը, ասել են, որ դա դեռ բաց քննարկում է:

Ուկրաինան նաեւ ավելացրել է հեռահար հրթիռների վերաբերյալ իր հարցումները։