Պեսկովը Թուրքիային հորդորել է Ղարաբաղի հարցով «կրակին յուղ չլցնել»

ՌԴ նախագահի մամուլի քարտուղար Դմիտրի Պեսկովը մեկնաբանել է Թուրքիայի դիրքորոշումը Լեռնային Ղարաբաղում հակամարտության վերաբերյալ: Ավելի վաղ հաղորդվել էր, որ Անկարան կարող է աջակցել Ադրբեջանին ինչպես բանակցային սեղանի շուրջ, այնպես էլ մարտի դաշտում:

«Կրեմլում ելնում են կրակի և ռազմական գործողությունների շուտափույթ դադարեցման անհրաժեշտությունից: Ռազմական աջակցության մասին ցանկացած հայտարարություն միանշանակ «կրակին յուղ լցնել է»,- շեշտել է Պեսկովը:

Նա նաև ասել է, որ Կրեմլը կտրականապես դեմ է հակամարտության կողմերից որևէ մեկին ռազմական աջակցության մասին հայտարարություններին: