Պաշտպանը Ռոբերտ Քոչարյանի խափանման միջոցի միջնորդության հարցով դիմել է ՄԻՊ-ին և ԲԴԽ-ին
ՀՀ երկրորդ նախագահ Ռոբերտ Քոչարյանի պաշտպան Արամ Վարդևանյանը դիմել է Մարդու իրավունքների պաշտպան Արման Թաթոյանին և Բարձրագույն դատական խորհրդի նախագահ Ռուբեն Վարդազարյանին՝ Քոչարյանին անձնական երաշխավորությամբ ազատ արձակելու միջնորդությունը քննելու շուրջ ստեղծված իրավիճակի հարցով։ Այս մասին հայտարարություն է տարածել Քոչարյանի պաշտպանական խումբը։
Պաշտպանին տեղեկացրել են, որ իր դիմումները ստացվել են և մուտք են արվել համապատասխան աշխատակազմերում։
Մարտի 23-ին Երևան քաղաքի ընդհանուր իրավասության դատարանը հրաժարվել էր մակագրել Ռոբերտ Քոչարյանի կալանավորումն անձնական երաշխավորությամբ փոխարինելու միջնորդությունը այլ դատավորի, պատճառաբանելով, որ սույն քրեական գործը գտնվում Աննա Դանիբեկյանի վարույթում և միջնորդությունը գտնվում է բացառապես իր լիազորությունների շրջանակում։
Սույն քրեական գործով հերթական դատական նիստը, որը նշանակված էր մարտի 17-ին, չի կայացել նախագահող դատավոր Աննա Դանիբեկյանի բացակայության պատճառով։
Ավելի ուշ հայտնի է դարձել, որ Դանիբեկյանը վիրահատություն է տարել։
Քոչարյանի խափանման միջոց կալանքը անձնական երաշխավորությամբ փոխարինելու առաջարկով հանդես են եկել ՀՀ նախկին վարչապետեր Վազգեն Մանուկյանը, Խոսրով Հարությունյանը և Կարեն Կարապետյանը, ինչպես նաև Արցախի նախկին վարչապետ Անուշավան Դանիելյանը:
Comments