Ուրսուլա ֆոն դեր Լյայենը կարող է հավակնել ՆԱՏՕ-ի գլխավոր քարտուղարի պաշտոնին․ Repubblica
- Anews
- Mar 7, 2023
- 1 min read
Եվրահանձնաժողովի ղեկավար Ուրսուլա ֆոն դեր Լյայենը կհավակնի ՆԱՏՕ-ի գլխավոր քարտուղարի պաշտոնին, եթե չվերընտրվի ԵՀ-ում։ Երեքշաբթի այս մասին գրել է իտալական la Repubblica թերթը։ Հրատարակության տվյալներով՝ դրա նախապատրաստական աշխատանքները սկսվել են մի քանի շաբաթ առաջ։ Մարտի 7-ից ֆոն դեր Լյայենի՝ Կանադա եւ ԱՄՆ ուղեւորությունը պետք է դիտարկվի «այլ լույսի ներքո», այսինքն՝ ՆԱՏՕ-ի գլխավոր քարտուղարի պաշտոնում նրա թեկնածության հնարավոր առաջադրման համատեքստում, գրում է թերթը։ Հուլիսին Վիլնյուսում դաշինքի գագաթաժողովում փորձ է արվելու մեկ տարով երկարացնել Յենս Սթոլթենբերգի պաշտոնավարման ժամկետը, որն ավարտվում է սեպտեմբերին, հայտնում է la Repubblica-ն։ Ֆոն դեր Լյայենի պաշտոնավարման ժամկետը լրանում է 2024 թվականի ամռանը։ Թերթը գրում է, որ Լյայենը, որպես ՆԱՏՕ-ի ղեկավար, «իդեալական լուծում կլիներ ամերիկացիների համար, քանի որ պոտենցիալ այլընտրանքային թեկնածուները այնքան էլ համոզիչ չեն»։ Եվրահանձնաժողովի նախագահը մարտի 7-ին կմեկնի Օտտավա, իսկ հաջորդ օրը՝ Վաշինգտոն։ ԱՄՆ մայրաքաղաքում նա կհանդիպի նախագահ Ջո Բայդենի հետ։ ԱՄՆ նախագահի մամուլի քարտուղար Կարին Ժան Պիերը հաստատել է ծրագրված հանդիպման մասին տեղեկությունը։ Նրա հայտարարության համաձայն՝ ֆոն դեր Լյայենը եւ Բայդենը կքննարկեն շրջակա միջավայրի եւ անվտանգության ոլորտներում համագործակցությունը, Ուկրաինայում տիրող իրավիճակը եւ Չինաստանի հետ փոխգործակցության հարցերը։
Comments