Շուռնուխի և Որոտանի սահմանային հարցերը կարող են ցավոտ իրավիճակների բերել․ Նիկոլ Փաշինյան

Տեղյակ եք, որ Սյուննիքի մարզում տեղի են ունենում սահմանների տեղորոշման աշխատանքներ. Այդ տեղորոշումը ունի որոշակի նրբություններ ու բարդություններ, բայց մեր համոզմունքն այն է, որ այդ աշխատանքը պետք է տեղի ունենա ու այն անհրաժեշտ է Սյունիքի ու Հայաստանի անվտանգության ապահովման տեսանկյունից: Այս մասին այսօր՝ դեկտեմբերի 24-ին, կառավարության հերթական նիստին ասաց Նիկոլ Փաշինյանը: Նա նկատեց, որ այս գործունեության հետ կապված կարող են լինել ամենատարբեր մեկնաբանություններ:

«Մենք ավելացնում ենք Սյունիքի անվտանգության երաշխիքները ու Հայաստանի անվտանգության երաշխիքները եւ Սյունիքի ու Հայաստանի անվտանգության նոր համակարգ ենք ձեւավորում: Երկու բնակավայր ունենք, որոնց հետ կապված կարող են ծագել որոշակի հարցեր, մեկը Որոտանի մասին է, երկրորդը՝ Շուռնուխի, որտեղ կան որոշակի սահմանային հարցեր, որոնց շուրջ ամենօրյա աշխատանք է տեղի ունենում»,-ասաց վարչապետը:

Փաշինյանն ասաց, որ այդ հարցերը կարող են որոշակի ցավոտ իրավիճակների բերել: Նա հավաստիացրեց, որ կառավարությունը համարժեք փոխհատուցումներով հանդես կգա ու մեր քաղաքացիների շահերը լիաժեք պաշտպանված կլինեն:

«Միջազգայնորեն ընդունված, ճանաչված տարածքից ոչ մի միլիմետր զիջման մասին խոսք չի եղել ու չի կարող լինել, բայց սա չի նշանակում, որ այս պրոցեսները պետք է համարել սահմանների դեմարկացիա ու սահմանների դելիմիտացիա: Տեղի է ունենում սահմանային կետերի տեղորոշում, որի նպատակը անվտանգության ապահովումն է»:

Փաշինյանը նշեց, որ այսօր քննարկում է ունեցել ՀՀ սահմանապահ զորքերի հրամանատարի հետ, տվել կոնկրետ հանձնարարականներ, թե ինչպես հնարավորինս սահուն ընթանա պրոցեսը: Փաշինյանը նշեց, թե քաղաքացիների հնարավոր գույքային վնասները կառավարությունն ամբողջությամբ կփոխհատուցի:

Փաշինյանը նկատեց, որ մեկ դեպքի հետ կապված կարող են լինել հազարավոր հրապարակումներ, 4 դեպքի հետ կապված՝ 4 հազար պրապարակում, բայց դա չի նշանակում, որ գործ ունենք 4 հազար դեպքերի հետ. «Մեզ մոտ եղել է խորհրդակցություն դեռ 10 օր առաջ եւ եղել է հանձնարարական, որ նախնական կոմունիկացիա արվի այդ հատվածների բնակիչների հետ, նրանց մանրամասն տեղեկատվություն տրվի, թե ինչ պրոցես է տեղի ունենում, եւ որ ամենակարեւորն է՝ քաղաքացիների հնարավոր գույքային վնասները կառավարությունը ամբողջությամբ եւ լիարժեք կփոխհատուցի»,-ասաց նա: