Նոր թարմացումներ սոցցանցերում․ ինչ է փոխվել և ինչպես օգտագործել

Սոցիալական ցանցերը շարունակում են արագ թարմացվել՝ առաջարկելով նոր գործիքներ թե՛ օգտատերերի, թե՛ բիզնեսների համար։ Այս շաբաթ WhatsApp-ը, TikTok-ը, LinkedIn-ը և X-ը ներկայացրել են մի շարք նոր ֆունկցիաներ, որոնք կարող են ազդել թե՛ հաղորդակցության և թե՛ գովազդի վրա։

1․ WhatsApp

WhatsApp-ը ավելացրել է երեք նոր գործիք խմբային չաթերի համար․

• Այժմ յուրաքանչյուր օգտատեր կարող է խմբում ընտրել իր դերը նկարագրող պիտակ (օրինակ՝ «Մարզիչ» կամ «Թիմի ղեկավար»)

• Ցանկացած բառ կարելի է վերածել ստիկերի անմիջապես որոնման դաշտից

• Խմբային իրադարձությունների համար հնարավոր է սահմանել հիշեցումներ

Բացի այդ, WhatsApp-ը սկսել է փորձարկել օգտանունների օգտագործումը հեռախոսահամարների փոխարեն, ինչը կբարձրացնի օգտատերերի գաղտնիությունը։ Այս ֆունկցիան լայնորեն կգործարկվի ավելի ուշ՝ տարվա ընթացքում։

2․ LinkedIn

LinkedIn-ը ընդլայնում է իր AI-ով աշխատող որոնման գործիքը։ Այժմ օգտատերերը կարող են պարզապես գրել, թե ինչ աշխատանք են փնտրում և AI-ը կառաջարկի համապատասխան պաշտոններ։

Նոր հնարավորությունն արդեն հասանելի է ոչ միայն անգլերեն, այլ նաև՝ իսպաներեն, ֆրանսերեն, գերմաներեն և պորտուգալերեն, ինչը դարձնում է գործիքը ավելի մատչելի։

3․ TikTok

TikTok-ը դադարեցնում է Custom Identity տարբերակը, որը թույլ էր տալիս գովազդ տեղադրել առանց TikTok պրոֆիլի։ Այսուհետ բոլոր գովազդային արշավները պետք է իրականացվեն ստուգված TikTok հաշվի միջոցով։ Ըստ TikTok-ի՝ սա բարձրացնում է թափանցիկությունը, վստահությունը և գովազդի արդյունավետությունը։

4․ X (նախկին Twitter)

X-ը ներկայացրել է նոր  «Առաջնահերթություն» (Priority) բաժին, որը ցույց է տալիս ամենակարևոր արձագանքները՝ այն օգտատերերից, որոնց դուք հետևում եք։ Այս ֆունկցիան ակտիվանում է, երբ հաշիվը ունի առնվազն 500 հետևորդ։