«Յուրաքանչյուր ոք, ով կարծում է, որ Արցախը պետք է մնա հայկական, ունի անելիք». Արտակ Բեգլարյան
Արցախի Հանրապետության պետական նախարար Արտակ Բեգլարյանը նոյեմբերի 13-14-ին մի շարք հանդիպումներ է ունեցել Նյու Յորքի և Նյու Ջերսիի հայկական համայնքների հետ՝ և՛ լայն կազմով, և՛ առանձին համայնքային կազմակերպությունների ղեկավար կազմերի: ԱՀ պետական նախարարի աշխատակազմի տեղեկատվության և հասարակայնության հետ կապերի բաժնից հայտնում են, որ հանդիպումների ժամանակ պետական նախարարը, շնորհակալություն հայտնելով տարիներ շարունակ Արցախի հանդեպ Սփյուռքի ցուցաբերած սրտացավության համար, ներկայացրել է ընթացիկ իրավիճակն ու ապագայի ծրագրերը: Նա ընդգծել է, որ առկա մարտահրավերները համատեղ հաղթահարելու համար անհրաժեշտ է երկարատև ու միասնական աշխատանք՝ մեծապես փոխելով Սփյուռքի ներգրավվածության ձևաչափերն ու աջակցության տեսակները: «Անհրաժեշտ է թոթափել հիասթափությունը և լծվել խելացի ու համբերատար ջանքերի իրականացմանը, ինչպես նաև անցյալի սխալների վերլուծության հիման վրա ապագայի պլանավորմանն ու կերտմանը: Անկախ վստահության առկա ճգնաժամից ողջ հայության մեջ՝ բոլորը կարող են լուծումներ ու մեխանիզմներ գտնել Հայրենիքի վերականգնմանն ու զարգացմանը նպաստելու հարցում: Յուրաքանչյուր ոք, ով կարծում է, որ Արցախը պետք է մնա հայկական, ունի անելիք»,- նշել է Արտակ Բեգլարյանը: Անմիջական մթնոլորտում տեղի ունեցած մտքերի փոխանակման ընթացքում պետական նախարարը պատասխանել է Արցախի ներկա ու ապագա անվտանգությանը, ժողովրդագրությանը, տնտեսությանն ու այլ ոլորտներին առնչվող բազմաթիվ հարցերի:
Comments