Մոսկվան ու Կիևը բանակցությունների նոր փուլի մասին են պայմանավորվել

Գոմելում Ռուսաստանի եւ Ուկրաինայի պատվիրակությունների բանակցությունները մոտ հինգ ժամ են տեւել, կողմերն անցել են ամբողջ օրակարգով։ Այս մասին հայտարարել է ՌԴ նախագահի օգնական Վլադիմիր Մեդինսկին, ով գլխավորում է ռուսական պատվիրակությունը։

Նրա խոսքով, կողմերին հաջողվել է գտնել այն կետերը, որոնցով հնարավոր է ընդհանուր դիրքորոշումներ կանխատեսել։ Նա հայտնել է, որ Մոսկվան եւ Կիեւը պայմանավորվել են շարունակել բանակցությունները, եւ հաջորդ հանդիպումն առաջիկա օրերին կկայանա, փոխանցում է «ՌԻԱ Նովոստին»։

Պատվիրակության անդամ, Պետդումայի միջազգային հարցերի հանձնաժողովի ղեկավար Լեոնիդ Սլուցկին նշել է, որ Ուկրաինայի հետ բանակցություններում գտվել են կետեր, որոնցով հնարավոր է առաջընթացը։ Նրա խոսքով՝ ուկրաինական պատվիրակությունը պատրաստ է եղել լսել եւ մասնակցել արդիական հարցերի առավել մանրամասն եւ հանգամանալից քննարկմանը, փոխանցում է ՏԱՍՍ-ը։

Նախագահ Վլադիմիր Զելենսկու աշխատակազմի ղեկավարի խորհրդական Միխայիլ Պոդոլյակը հաստատել է, որ կողմերը պայմանավորվել են բանակցությունների հաջորդ փուլի մասին։ Նրա խոսքով, «կողմերը առանձնացրել են մի շարք առաջնահերթ թեմաներ, որոնց վերաբերյալ որոշակի լուծումներ են նախանշվել»։

Բանակցությունների մասնակիցները վերադառնում են իրենց երկրների մայրաքաղաքներ՝ արդյունքները քննարկելու համար, հայտնում է ՈՒՆԻԱՆ-ը։