Մեր խնդիրը ոչ թե շենք մտնելն է, այլ այն արգելափակելը. Իշխան Սաղաթելյան
Մենք հայտարարեցինք, որ ըստ ցանկության կարգելափակենք բոլոր պետական հիմնարկները, թույլ չենք տա, որ մարդիկ աշխատեն, քանի որ նրանք գերությունից ազատվելու կարիք ունեն։ Մեր խնդիրը ոչ թե շենք մտնելն է, այլ այն արգելափակելը։ Այս մասին մայիսի 11-ին Երեւանի քաղաքապետարանի շենքի դիմաց Դիմադրության շարժման երթի ժամանակ հայտարարեց ԱԺ փոխնախագահ Իշխան Սաղաթելյանը։
«Նիկոլը քաղաքապետարանը դարձրեց «Քաղաքացիական պայմանագրի» գրասենյակ, մարդկանց իրենց հայացքների համար ազատում են աշխատանքից, մարդկանց ճնշում են, հիմա թող տեսնեն՝ ինչ ճնշում կա։ Ինչքան ուզենք, կփակենք»,-ասաց Սաղաթելյանը։
Երթի մասնակիցները վանկարկում են՝ «Նիկոլ, դավաճան, հեռացիր», «Հայաստանն առանց Նիկոլի», «Հայաստանն առանց թուրքի»։
Իր հերթին, «Հայաստան» խմբակցության պատգամավոր Արծվիկ Մինասյանն ասաց, որ եթե քաղաքապետարանի աշխատակազմը ցանկանա միանալ իրենց պայքարին, կարող է դա անել, այլապես չեն կարողանա ներս ու դուրս անել։
