Ղրղըզստանում առաջարկել են Տաջիկստանի հետ սահմանին ՀԱՊԿ ուժեր տեղակայել

Ղրղըզստանի պաշտպանության նախարար Բաքթիբեկ Բեկբոլոտովն առաջարկել է Տաջիկստանի հետ սահմանին ՀԱՊԿ ոչ մեծ զորակազմ տեղակայել՝ խաղաղության պահպանման նպատակով։ «Ես վերջերս հանդիպել եմ ՀԱՊԿ գլխավոր քարտուղար Զասի հետ։ Ես նրան ասացի, որ Ղրղըզստանի եւ Տաջիկստանի միջեւ խաղաղություն չի լինի։ Ինչո՞ւ։ Որովհետեւ ղրղըզներն իրենց ճիշտն ունեն, տաջիկներն՝ իրենց։ Քանի դեռ մեր միջեւ միջնորդ դատավոր չկա, օրինակ՝ ՀԱՊԿ ոչ մեծ զորակազմ, խաղաղություն չի լինի»,- չորեքշաբթի Բիշքեկում տեղի ունեցած մամուլի ասուլիսում ասել է նախարարը։ Նրա խոսքով՝ խաղաղարարները կարող էին վերահսկել հրադադարի ռեժիմը եւ հետեւել, որպեսզի կողմերը սահման չբերեն լրացուցիչ ուժեր եւ տեխնիկա։ «Երբ այս խնդիրները լուծվեն, կարելի է լուծել նաեւ քաղաքական հարցերը՝ շարունակել սահմանազատումը եւ սահմանագծումը»,- ընդգծել է նա։ Երկու պետությունների միջեւ անորոշ տարածքները պարբերաբար դառնում են հակամարտության գոտի։ Վերջին անգամ իրավիճակը տաջիկա-ղրղըզական սահմանին սրվել է սեպտեմբերի 14-16-ին։ Ղրղըզական կողմը տեղեկացրել է մարտական բախումների հետեւանքով 63 զոհվածի եւ 198 տուժած քաղաքացու մասին։ Տաջիկական կողմը հայտարարել է 41 զոհվածի եւ 30 տուժածի մասին։