Հայկական կողմը իրավիճակի դեէսկալացման միջոցառումների փաթեթ է պատրաստել. ԱԳՆ
Հայաստանը ռուսական կողմի միջոցով սահմանային գոտում իրավիճակը դեէսկալացման վերաբերյալ առաջարկների փաթեթ է փոխանցել Ադրբեջանին։ Այս մասին հունվարի 19-ին Ազգային ժողովում պատգամավորների հետ հանդիպման ժամանակ հայտարարեց ՀՀ արտաքին գործերի նախարար Արարատ Միրզոյանը։
Միրզոյանի խոսքով` հայկական կողմը իրավիճակի դեէսկալացման, ինչպես նաեւ սահմանային գոտում կայունության եւ անվտանգության բարձրացման միջոցառումների փաթեթ է պատրաստել։
«Փաթեթը փոխանցվել է ինչպես Ռուսաստանին, այնպես էլ Մոսկվայի միջոցով Ադրբեջանին։ Մանրամասները, իհարկե, չեմ կարող բացահայտել։ Իմաստ չկա։ Կարող եմ միայն ասել, որ դրանք բխում են Հայաստանի վարչապետի կողմից բարձրացվող զորքերի հայելային դուրսբերման եւ անվտանգության հավելյալ մեխանիզմների ստեղծման հարցերից»,- նշեց ԱԳ նախարարը։
Նա նաեւ հավելեց, որ այս փաթեթը ներկայացվել է Անվտանգության խորհրդի նիստին։
Ավելի վաղ ՌԴ ԱԳ նախարար Սերգեյ Լավրովը հայտնել էր, որ զրուցել է իր հայ գործընկերոջ հետ։ Նրանք, մասնավորապես, քննարկել են սահմանազատման մասով հանձնաժողովի ստեղծման հարցը։
