Կիպրոսի նախագահը Բայդենին կոչ է արել առավել առաջատար տեղ զբաղեցնել Կիպրոսի խնդրի կարգավորման հարցում

Կիպրոսի Հանրապետության նախագահ Նիկոս Անաստասիադիսն ԱՄՆ նախագահ Ջո Բայդենին ուղղված նամակում կոչ է արել առավել առաջատար տեղ զբաղեցնել Կիպրոսի հիմնախնդրի կարգավորման հարցում, հայտնում է կիպրական Phileleftheros թերթը և հավելում, որ նույն շաբաթվա ընթացքում Անաստասիադիսն առանձին նամակներ էր ուղարկել նաև ՆԱՏՕ-ի Անվտանգության խորհրդին և Եվրամիությանը։

«Բայդենը շարունակում է մնալ այն առաջնորդը, որը կարող է Կիպրոսի հարցի շուրջ արդյունավետ աշխատանք տանել Թուրքիայի նախագահ Ռեջեփ Թայիփ Էրդողանի հետ», - ասել է Կիպրոսի նախագահը և հավելել, որ Բայդենը միաժամանակ շահագրգռված է խնդրի լուծման հարցում և լավ հարաբերություններ ունի։

Նամակում մանրամասներ են ներկայացվել Ժնևում կայացած վերջին բանակցություններից։ Հայտնի է, որ Անաստասիադիսը նամակ է գրել նաև ՄԱԿ-ի գլխավոր քարտուղար Անտոնիո Գուտերեշին և առաջարկել Կիպրոսի թուրքական հատվածի նախագահի հետ համատեղ հանդիպում անցկացնել։

Ավելի վաղ ԱՄՆ-ի ներկայացուցիչ Նիկոլ Մալիոտակիսը ներկայացրել էր Ներկայացուցիչների պալատի բանաձևը, որի համաձայն Բայդենին կոչ է արվում Կիպրոսի հարցը դարձնել արտաքին քաղաքականության գերակա խնդիր։

Հիշեցնենք, որ Թուրքիան 1974 թվականին ներխուժել է Կիպրոսի հյուսիսային շրջաններ և հռչակել «Հյուսիսային Կիպրոսի Թուրքական Հանրապետության» ստեղծումը։ Այս կապակցությամբ ՄԱԿ-ի Անվտանգության խորհուրդն ընդունել է թիվ 550 բանաձևը՝ «Հյուսիսային Կիպրոսի Թուրքական Հանրապետություն»-ը ճանաչելով անօրինական։ Թուրքիան, սակայն, չի ընդունում հարցի որևէ լուծում՝ բացառությամբ երկու պետության լուծման տարբերակը։