Խորհրդակցություն ԱԻՆ-ում. ՓԾ տնօրենը հանձնարարականներ է տվել

Արտակարգ իրավիճակների նախարարությունում օգոստոսի 27-ին Փրկարար ծառայության տնօրեն Արմեն Գասպարյանի գլխավորությամբ անցկացվել է խորհրդակցություն: Այս մասին տեղեկանում ենք ԱԻՆ-ից։ Մասնակցել են Փրկարար ծառայության տնօրենի տեղակալները, կառուցվածքային ստորաբաժանումների, Երեւանի եւ մարզային հրշեջ-փրկարարական ջոկատների (ՀՓՋ) պետերը: Հանդիպման նպատակն աշխատանքային գործընթացների քննարկումն էր: ՓԾ տնօրենը մատնանշել է կոնկրետ թերություններ եւ հանձնարարել դրանք վերացնել առավելագույն սեղմ ժամկետներում: Ա. Գասպարյանը բարձր է գնահատել Սեւանա լճում ՀՓՋ-ների եւ Հատուկ նշանակության փրկարարական աշխատանքների իրականացման կենտրոնի գործունեությունը՝ քաղաքացիների անվտանգության ապահովման եւ պատշաճ հսկողություն սահմանելու առումով: ՀՓՋ-ների շենքային պայմանների վերաբերյալ զեկուցել են ծառայության տնօրենի տեղակալներ Կարապետ Մանուկյանը եւ Տիգրան Պետրոսյանը: Նշվել է, որ 11 շինություն այսօրվա դրությամբ հիմնովին վերանորոգման կարիք ունի: ՓԾ ղեկավարը հանձնարարել է շարունակել ուշադրության տակ պահել նաեւ COVID-19 համավարակի դեմ տարվող աշխատանքները: Խորհրդակցության ավարտին տրվել են հանձնարարականներ՝ կատարողական կարգապահության եւ աշխատանքի արդյունավետության բարձրացման առնչությամբ: