Իսրայելական բանակը ցամաքային օպերացիա է նախապատրաստում Գազայի հատվածում
Իսրայելական բանակն արդեն տարատեսակ նախապատրաստական աշխատանքներ է իրականացնում Գազայի հատվածում ցամաքային օպերացիայի համար, սակայն դրա անցկացման հրաման դեռ չի եղել, ասել է Իսրայելի պաշտպանական ուժերի ներկայացուցիչ Յոնաթան Կոնրիկուսը, փոխանցում է «ՌԻԱ Նովոստի»-ն:
«Զորքերը «Գազա» դիվիզիայում գտնվում են նախապատրաստման տարբեր փուլերում, այդ թվում՝ Գլխավոր շտաբի ղեկավարության հանձնարարականների, սակայն նման օպերացիայի իրականացման հրաման դեռ չի տրվել: Ռազմական նախապատրաստական աշխատանքներ իսկապես ընթանում են»,- ասել է Կոնրիկուսը՝ պատասխանելով ցամաքային օպերացիայի հնարավորության մասին լրագրողների հարցին:
Շաբաթ գիշերն Արեւելյան Երուսաղեմում լայնածավալ բախումներ տեղի ունեցան պաղեստինցիների եւ իսրայելական ոստիկանության միջեւ: Անկարգությունները սկսվեցին Արևելյան Երուսաղեմի միանգամից երկու թաղամասերում՝ Տաճարի լեռան մոտ եւ Շեյխ Ջարրահ թաղամասում, որտեղ իսրայելական դատարանի որոշմամբ մի քանի արաբ ընտանիք վտարվում է:
Դրանից հետո երկուշաբթի երեկոյան իրավիճակը կտրուկ սրվեց Իսրայելի եւ պաղեստինյան Գազայի հատվածի սահմանին, որի ղեկավարությունը դուրս եկավ ի պաշտպանություն Երուսաղեմի պաղեստինցիների՝ Իսրայելից պահանջելով դուրս գալ Տաճարի լեռից: Հրթիռային հարձակումները իսրայելական բնակավայրերի վրա գրեթե չեն դադարում: Վերջին տվյալների համաձայն՝ զոհվել է վեց խաղաղ բնակիչ եւ մեկ իսրայելցի զինվոր: Իսրայելը հարվածներ հասցրեց Գազայի հատվածի ուղղությամբ՝ խոցելով պաղեստինյան «ՀԱՄԱՍ» եւ «Իսլամական ջիհադ» խմբավորումների թիրախները եւ սպանելով մի քանի գրոհայինի, այդ թվում՝ բարձրաստիճան դաշտային հրամանատարների: Ըստ Պաղեստինի առողջապահության նախարարության տվյալների՝ Գազայում իսրայելական հարձակումների արդյունքում 67 մարդ է զոհվել:
