Երկրից իմ մեկնելու արգելքը քաղաքական դրդապատճառներ ունի. Արմեն Աշոտյան
Երկրից իմ մեկնելու արգելքը քաղաքական դրդապատճառներ ունի, ընդ որում՝ ոչ ներքաղաքական։ Նոյեմբերի 16-ին լրագրողների հետ հանդիպմանն այս մասին ասաց Հայաստանի Հանրապետական կուսակցության փոխնախագահ Արմեն Աշոտյանը։
Նա պարզաբանեց, որ մտադիր էր առաջ տանել հայկական շահերը Եվրոպական ժողովրդական կուսակցության քաղաքական համաժողովի ժամանակ, «որտեղ Փաշինյանը դրանք վաճառում է»։
Աշոտյանը չբացառեց, որ նման գործողություններով իշխանությունները կարող են նպատակ ունենալ շեղել հասարակության ուշադրությունը հիմնական օրակարգից։
Ընդդիմադիրն ասաց, որ ՀՀԿ մեկ այլ ներկայացուցիչ Հայկ Մամիջանյանը մեկնել է Լիսաբոն։
Նա Փաշինյանին հրավիրել էր բանավեճի Ղարաբաղի հարցով՝ վարչապետին մեղադրելով, որ նա թաքնվում է իրավապահների թիկունքում։
Աշոտյանը համոզմունք հայտնեց, որ իր նկատմամբ հետին թվով մեղադրական եզրակացություն կկազմվի։ «Օմբուդսմենի գրասենյակից ինձ ասացին, որ եթե լուրջ բան լիներ, ինձ արդեն կձերբակալեին»,- ասաց նա՝ հորդորելով Մարդու իրավունքների պաշտպանին զբաղվել գերիների եւ հակառակորդի զենքի տակ ապրող քաղաքացիների անվտանգության հարցերով։
ՀՀԿ փոխնախագահը վստահություն հայտնեց, որ եթե ինքը նախապես չհայտարարեր մեկնելու մասին, ապա իշխանությունները դիմակ-շոու կկազմակերպեին՝ այն երկրից փախուստի կանխում ներկայացնելով։
«Ես չգիտեմ, թե ինչ ցուցմունքներ են տվել Երեւանի պետական բժշկական համալսարանի նախկին ռեկտորի դեմ հարուցված քրեական գործով անձինք, բայց եթե իմ դեմ ցուցմունքներ լինեին, ես արդեն ձերբակալված կլինեի»,- եզրափակեց Արմեն Աշոտյանը։
