Գյումրիում «Արվեստի կառավարում և հանրայնացում» խորագիրը կրող դասընթաց կանցկացվի
Կոմիտասի անվան պետական կոնսերվատորիայի Գյումրու մասնաճյուղում սեպտեմբերի 17-ին, ժամը 14։00-ին տեղի կունենա «Արվեստի կառավարում և հանրայնացում» խորագիրը կրող դասընթաց։
Հանդիպման ընթացքում կքննարկվեն այն կարևոր դրույթները և գործիքները, որոնք օգնում են մշակութային ոլորտի կառույցներին և ներկայացուցիչներին ավելի արդյունավետ դարձնել ստեղծագործական պրոցեսը ու առաջխաղացումը և հնարավորինս շատ հանրայնացում են ապահովում մշակութային նախագծերին և միջոցառումներին՝ հասցնելով դրանք հանրության լայն շերտերին։
Դասընթացը կվարի PR մասնագետ, մշակութային լրագրող Ռոզա Գրիգորյանը և «ԼՈՖԹ» ինքնազարգացման կենտրոնների ցանցի ստեղծագործական ղեկավար, երաժիշտ Ալեքս Միրզոյանը։
Հանդիպումը կազմակերպել է Կոմիտասի անվան պետական կոնսերվատորիայի Գյումրիի մասնաճյուղը՝ Կամերային երաժշտության ազգային կենտրոնի և «ԼՈՖԹ» ինքնազարգացման կենտրոնի հետ համագործակցությամբ։
Նշենք, որ վերջերս երկու բանախոսների մասնակցությամբ իրականացվեց «Դասական ոլորտի լուսաբանումը ԶԼՄ-ներում» խորագրով առցանց դասընթաց-քննարկում:
