Բովանդակություն ստեղծելը հեշտացել է, ասելիք ունենալու արժեքը՝ մեծացել. Աստղիկ Ավետիսյան
Արհեստական բանականությունը կարող է օգնել գրել տեքստ, մշակել վերնագիր, ստեղծել պատկեր և նույն գաղափարը ներկայացնել տարբեր ձևաչափերով։ Մասնագետը ժամանակ է խնայում և հնարավորություն ստանում փորձարկել ավելի շատ տարբերակներ։
Բայց արագության հետ մեծանում է նաև առանց մտածելու հրապարակելու գայթակղությունը։ Սահուն շարադրանքը կարող է թաքցնել փաստական սխալը, համոզիչ պատկերը՝ հորինված իրադարձությունը, գեղեցիկ ձևակերպումը՝ սեփական մտքի բացակայությունը։
Ինձ՝ որպես հաղորդակցության մասնագետի և դասախոսի, հատկապես մտահոգում է հեղինակային ձայնի կորուստը։ Երբ պատրաստի պատասխանը ընդունում ենք առանց վերլուծելու, մեր խոսքից աստիճանաբար դուրս են մնում անձնական փորձը, դիտարկումը, կասկածն ու ինքնուրույն եզրահանգումը։ Տեքստը դառնում է հղկված, բայց հեղինակը՝ դժվար ճանաչելի։
PR-ում յուրաքանչյուր հրապարակում ազդում է վստահության վրա։ Հետևաբար ԱԲ-ի հետ աշխատանքը պահանջում է հստակ խմբագրական պատասխանատվություն՝ ստուգել փաստերը, գնահատել ձևակերպումների իմաստը, պահպանել բրենդի արժեքներն ու հարգել լսարանին։
Դասավանդման մեջ նույնպես կարևոր եմ համարում գնահատել ուսանողի մտածողության ընթացքը․ ինչո՞ւ է ընտրվել տվյալ գաղափարը, ինչպե՞ս է ստուգվել տեղեկությունը, ի՞նչ է վերանայվել ԱԲ-ի առաջարկած տարբերակում։ Պատրաստի տեքստի որակը դեռ ամբողջությամբ չի բացահայտում սովորողի գիտելիքը։
Արհեստական բանականությանը կարելի է պատվիրակել աշխատանքի մի մասը։ Հրապարակված խոսքի պատասխանատվությունը մնում է հեղինակինը։ Տեղեկատվությունը փոխանցում է Հայկական PR ասոցիացիայի նախագահ, Հայկական PR ակադեմիայի հիմնադիր, մեդիայի և հաղորդակցության փորձագետ Աստղիկ Ավետիսյանը։
Comments