Արայիկ Հարությունյանն ընդունել է Հայ բարեգործական ընդհանուր միության նախագահին
Արցախի Հանրապետության նախագահ Արայիկ Հարությունյանը հունիսի 5-ին ընդունել է Հայ բարեգործական ընդհանուր միության նախագահ Պերճ Սեդրակյանի գլխավորած պատվիրակությանը: Այս մասին հայտնում են ԱՀ նախագահի աշխատակազմից:
Երախտագիտություն հայտնելով միության ազգանվեր գործունեության համար՝ երկրի ղեկավարն այդ համատեքստում ընդգծել է Արցախում իրականացված և ընթացքում գտնվող բազմաթիվ ծրագրերը: Նա մասնավորապես անդրադարձել է պատերազմից հետո Արցախում ստեղծված իրավիճակին, առաջացած սոցիալ-տնտեսական ու հոգեբանական խնդիրներին, և դրանց հաղթահարման ճանապարհին աշխարհասփյուռ հայության կողմից ցուցաբերված և ակնկալվող ջանքերին:
Պերճ Սեդրակյանն իր խոսքում նշել է, որ չնայած 2020թ.-ի պատերազմի հետևանքները բացասական առումով մեծապես ազդել են սփյուռքահայության տրամադրությունների վրա, բայց Արցախում ապրող հայրենակիցներին նեցուկ կանգնելու և ստեղծված ծանր իրավիճակը միասնաբար հաղթահարելու գիտակցումն առկա է։ Եվ ՀԲԸՄ-ն ևս պատրաստ է իր կարևոր ներդրումն ունենալու:
Հանդիպման ընթացքում զրուցակիցները քննարկել են օրախնդիր համարվող մի շարք ծրագրեր:
