Արամ Սաֆարյանն առաջարկեց հանձնաժողովին կից փորձագիտական խորհուրդ ստեղծել
Մարդու իրավունքների խորհրդարանական հանձնաժողովի նախկին ղեկավար, «Ինտեգրացիա եւ զարգացում» հասարակական կազմակերպության նախագահ Արամ Սաֆարյանը հանձնաժողովի ներկայիս ղեկավար Թագուհի Թովմասյանին առաջարկեց հանձնաժողովին կից փորձագիտական խորհուրդ ստեղծել: Արամ Սաֆարյանն իր առաջարկը հնչեցրեց Թովմասյանի եւ հանձնաժողովի նախկին ղեկավարների եւ իրավապաշտպանների հետ հանդիպմանը:
Արամ Սաֆարյանը հիշեցրեց, որ ինքը քաղաքականությունից դուրս է եկել 2012 թվականից, որեւէ կուսակցության անդամ չէ եւ չի ցանկանում, որ իր ներկայությունն ընկալվի ինչ-որ մեկի օգտին կամ դեմ:
«Ես զբաղվում եմ գիտական եւ խորհրդատվական աշխատանքներով: Ես պատրաստ եմ իմ գիտելիքներն օգտագործել ձեր հանձնաժողովի աշխատանքներին օգնելու համար»,- ասաց նա: Սաֆարյանն առաջարկեց հանձնաժողովին կից փորձագիտական խորհուրդ ստեղծել, որը կարող է ընդգրկել ոլորտի 5-7 հեղինակավոր ներկայացուցչի:
Սաֆարյանը միաժամանակ առաջարկեց խորացնել համագործակցությունը Հանրային խորհրդի հետ, ինչպես դա եղավ, երբ նա հանձնաժողովի ղեկավարն էր:
Comments