Ուսուցիչների կամավոր ատեստավորումը կմեկնարկի նոյեմբերի 7-ին․ առարկաների ժամանակացույցը

Թեմատիկ լուսանկար

Հանրակրթական դպրոցների ուսուցիչների 2026 թվականի կամավոր ատեստավորումը կմեկնարկի նոյեմբերի 7-ին։ ԿԳՄՍ նախարարության՝ հոկտեմբերի 23-ին հրապարակած ժամանակացույցով քննությունները կանցկացվեն նոյեմբերի վեց օրերին՝ մինչև նոյեմբերի 22-ը։

Նոյեմբերի 7-ին՝ ժամը 10:00-ին, նախատեսված են պատմության և աշխարհագրության քննությունները։ Նույն օրը՝ 15:00-ին, ատեստավորում կանցնեն «Թվային գրագիտություն և համակարգչային գիտություն», տեխնոլոգիա, երաժշտություն և կերպարվեստ առարկաների ուսուցիչները։ Նոյեմբերի 8-ին՝ ժամը 10:00-ին, կանցկացվի հայոց լեզվի քննությունը։

Նոյեմբերի 14-ին՝ ժամը 10:00-ին, նախատեսված է անգլերենի քննությունը։ Նույն ժամին թղթային եղանակով կանցկացվեն եզդիերենի, պարսկերենի և ասորերենի քննությունները։ Ժամը 15:00-ին հերթը քիմիայի, կենսաբանության և ֆիզիկայի ուսուցիչներինն է։

Նոյեմբերի 15-ին՝ ժամը 10:00-ին, նախատեսված է տարրական մանկավարժության և մեթոդիկայի՝ դասվարների քննությունը։

Նոյեմբերի 21-ին՝ ժամը 10:00-ին, կանցկացվեն ֆիզկուլտուրայի և շախմատի, իսկ 15:00-ին՝ ռուսաց լեզվի, ֆրանսերենի ու գերմաներենի քննությունները։ Նոյեմբերի 22-ին՝ ժամը 10:00-ին, նախատեսված է մաթեմատիկայի, իսկ 15:00-ին՝ հասարակագիտության և ՆԶՊ-ի քննությունը։

Նախարարությունը նշել է, որ քննական կենտրոնների և լրացուցիչ մանրամասների մասին ուսուցիչները կտեղեկացվեն անհատական ծանուցումներով։ Հետևաբար հրապարակված ընդհանուր ժամանակացույցին զուգահեռ անհրաժեշտ է ստուգել նաև սեփական ծանուցումը՝ քննության վայրը ճշտելու համար։

ԿԳՄՍՆ-ի պաշտոնական ժամանակացույցը