PR ոլորտը 2026-ին. ինչ է փոխվելու և ով է հաղթելու

2026 թվականը PR ոլորտի համար լինելու է բովանդակության, մեդիա հարաբերությունների և արհեստական բանականության տարի։ Թեև 2025-ը բարդ էր՝ թե՛ քաղաքական, թե՛ տնտեսական, թե՛ մասնագիտական առումով, նոր տարին բերում է մի շարք հնարավորություններ նրանց համար, ովքեր կարողանում են դրսևորել արագ հարմարվողականություն։

Արհեստական բանականությունն այլևս ընտրություն չէ, այլ՝ ստանդարտ։ PR մասնագետների համար ԱԲ գործիքների օգտագործումը դառնում է նույնքան բնական, որքան էլ-փոստը կամ տեքստային խմբագրիչները։ Բովանդակության ստեղծումից մինչև մեդիա մոնիթորինգ՝ ԱԲ-ն արագացնում է գրեթե բոլոր գործընթացները։ Միևնույն ժամանակ մարդկային «ձեռագիրը» դառնում է առավել արժեքավոր։ Քանի որ համացանցը լցվում է ԱԲ-ով ստեղծված միանման բովանդակությամբ, առավել տեսանելի են դառնում այն նյութերը, որոնք ունեն անհատական ոճ, հումոր, իրական պատմություններ և մարդկային անկեղծություն։ 2026-ին հաղթելու են նրանք, ովքեր կարողանալու են տարբերվել ու կառուցել հանրային վստահություն։

ԱԲ-ի շնորհիվ կեղծ հաշիվների (բոտերի) ազդեցությունը հասել է աննախադեպ մակարդակի։ Նրանք կարող են փոքրիկ թեման վերածել համաշխարհային սկանդալի՝ նախքան իրական լրագրողները կհասցնեն արձագանքել։ PR մասնագետների համար 2026-ին առաջնային է դառնում նմանատիպ գրոհների վաղ հայտնաբերումը և կանխարգելումը։

2025-ի ճգնաժամը PR գործակալություններում կշարունակվի նաև 2026-ին։ Սակայն սա նաև նոր հնարավորություն է. շատ մասնագետներ լքում են մեծ կորպորացիաները և հիմնում սեփական փոքրիկ գործակալությունները կամ անցնում ֆրիլանսի։ Սա կարող է հանգեցնել ոլորտի «ստեղծագործական վերածննդին»։ ԱԲ մոդելները (ChatGPT և այլն) ավելի ու ավելի հաճախ են օգտագործվում որպես որոնողական համակարգեր։ Հետազոտությունները ցույց են տալիս, որ ԱԲ-ի հղումների 27%-ը բաժին է ընկնում որակյալ լրագրությանը, իսկ 9%-ը՝ կորպորատիվ բլոգներին։ Սա նշանակում է, որ մեդիա կապերն ու բովանդակության ստեղծումը դառնում են ավելի արժեքավոր, քան երբևէ։ Ավանդական լրատվամիջոցները շարունակում են թուլանալ, իսկ լսարանի վստահությունը տեղափոխվում է դեպի անհատականություններ՝ ինֆլյուենսերներ, անկախ լրագրողներ և յութուբերներ։ Մարդիկ ցանկանում են վստահել մարդուն, այլ ոչ թե կազմակերպությանը։

Այսպիսով, 2026 թվականին հաղթելու են այն PR մասնագետները, որոնք կարողանալու են համադրել ԱԲ-ի գործիքներն ու մարդկային պատմությունները։