Clubhouse սոցիալական ցանցը կթողարկի հատուկ հավելված Android-ի համար
Clubhouse սոցիալական ցանցը կթողարկի պաշտոնական հավելված Android օպերացիոն համակարգի համար: Այդ մասին հաղորդվում է ընկերության կայքում, գրում է Lenta-ն:
Շուրջ մեկ տարի պաշտոնական հավելվածը հասանելի էր միայն iOS համակարգի օգտատերերի համար: Մայիսի 9-ից հավելվածը հասանելի կլինի ԱՄՆ-ում օգտատերերի համար, իսկ մի քանի շաբաթվա ընթացքում սոցցանցը կգործարկի այն ամբողջ աշխարհում:
«Առաջիկա շաբաթների ընթացքում մեր ծրագիրը կայանում է նրանում, որ հավաքագրենք հանրության արձագանքը, շտկենք ցանկացած խնդիրները, որոնք մենք տեսնում ենք, եւ աշխատենք մի քանի վերջնական գործառույթ ավելացնելու ուղղությամբ»,-նշել են ընկերությունում:
Ապրիլին հաքերները ցանցում տարածել էին Clubhouse սոցցանցի 1,3 միլիոն օգտատիրոջ տվյալները: Արտահոսքի ենթարկված տվյալներն էին անուն-ազգանունները, անձնական էջերում լուսանկարների հղումները, ինչպես նաեւ ուրիշ սոցցանցերում օգտատերերի օգտահաշիվների մասին տեղեկատվությունը:
Clubhouse-ը նոր սոցիալական ցանց է, որում կարելի է գրանցվել միայն հրավերի դեպքում: Ծառայությունը կարճ ժամանակահատվածում ձեռք է բերել համաշխարհային ճանաչում հիմնականում դրա նկատմամբ հայտնիների, մասնավորապես, SpaceX-ի հիմնադիր Իլոն Մասկի հետաքրքրության շնորհիվ: