Search

«Պետությունը պետք է ստեղծի բոլորին հասանելի կրթական համակարգ ». Լևոն Մկրտչյան



ՀՀ կրթության և գիտության նախարար Լևոն Մկրտչյանն այսօր աշխատանքային այցով եղել է Աշտարակում և մասնակցել Արագածոտնի մարզի դպրոցների տնօրենների տարեվերջյան խորհրդակցությանը: Նախարարն իր ելույթում անդրադարձել է կրթական ոլորտում սպասվող փոփոխություններին՝ հիմնական շեշտը դնելով հանրակրթության բովանդակային խնդիրների վրա: Լ. Մկրտչյանի խոսքով՝ կրթության համակարգում ինստիտուցիոնալ փոփոխությունները կարելի է համարել ավարտված և հերթն այժմ կրթական ծրագրերին նոր բովանդակություն և որակ հաղորդելունն է:

Անդրադառնալով ավագ դպրոցների կայացման խնդրին՝ նախարարն ընդգծել է. « Այդ ուղղությամբ կարևոր քայլերից մեկը կրեդիտային համակարգի ներմուծումն է, որն իր հերթին կկարգավորի կրթության շղթայի արդյունավետ աշխատանքն ու բնականոն գործունեությունը,- նշել է Լ. Մկրտչյանը և մանրամասնել, որ նման համակարգը հնարավորություն կտա որոշ առարկաներից ստացած կրեդիտները տեղափոխել բուհ: Նախարարը կարևորել է նաև ավագ դպրոցի կրթական ծրագրի բեռնաթափումը՝ նշելով, որ գործող ծրագիրը ոչ միայն չի ապահովում սահուն անցում կրթության հաջորդ աստիճան, այլև ընդգծված չեն մասնագիտական ուղղությունները: ԿԳ նախարարն անդրադարձել է դպրոցական ծրագրի առարկայախմբերին, նշելով, որ դպրոցական համակարգում նախընտրած դասաժամերի ծավալը պետք է չլրացվի մեկ այլ առարկայախմբի հաշվին: Այս համատեքստում ըստ նախարարի՝ պետք է գտնել լավագույն ոսկե միջինը բոլոր առարկայախմբերի համար: Այս պահանջը, որպես գերակա խնդիր դրված է չափորոշիչներ մշակող մասնագիտական խմբի առջև: Կրթական նոր ծրագրի կառուցվածքում Լ. Մկրտչյանը կարևորել է պարտադիր առարկայական ժամաքանակների առկայությունը, ընդգծելով, որ շեշտը պետք է դրվի բնագիտական ուղղվածության մեծացման վրա: Լ. Մկրտչյանը նշել է, որ այս նպատակով կմշակվեն բնագիտական առարկաների պահպանման և զարգացման նոր մեխանիզմներ: Նախարարն իր խոսքում առանձնակի կարևորել է գյուղական դպրոցների տնօրենների հանրային դերը՝ շեշտելով, որ այդ կերպարը պետք է լինի տվյալ համայնքում բացառիկ հարգանք վայելող անձնավորություն: Պատասխանելով խորհրդակցության մասնակից տնօրեններից մեկի հարցին՝ նախարարը նշել է, որ տնօրենների հավաստագրման, մանկավարժների տարակարգերի տրամադրման և ատեստավորման գործընթացներում կլինեն էական փոփոխություններ, որոնց վերաբերյալ կծավալվեն նաև մասնագիտական քննարկումներ: Անդրադառնալով բուհական համակարգում պետական պատվերով կրթություն ստանալու հնարավորություններին՝ նախարարը համաձայնվել է այն դիտարկմանը, որ գործող համակարգը սոցիալական իմաստով խնդիրներ է ունի և պետք է կարգավորվի օրենսդրական ճանապարհով. «Պետք է սոցիալապես անապահով ընտանիքի երեխայի համար բարձրագույն կրթություն ստանալու հնարավորություն ապահովել: Պետությունը պետք է ստեղծի բոլորին հասանելի համակարգ: Սա կրթության համակարգ նոր հոսք կբերի, այն հոսքը, որ մշտապես եղել է մեր ազգային կենսունակության աղբյուրը: Սա նաև նոր որակ կապահովի նախ բարձրագույն կրթության, ապա նաև մեր երկրի զարգացման համար »,- շեշտել է նախարարը: Հանդիպման ընթացքում նախարարը պատասխանել է դպրոցների ֆինանսավորման, տարիֆիկացիայի, բյուջեի ձևավորման, ինչպես նաև կառավարման խորհուրդների գործունեության արդյունավետության բարձրացմանը վերաբերող հարցերին: Հանդիպման ավարտին ՀՀ ԿԳ նախարար Լևոն Մկրտչյանը և Արագածոտնի մարզպետ Գագիկ Գյոզալյանը կոչ են արել տնօրեններին առաջիկա Վերջին դասի միջացառումների կազմակերպման ժամանակ զերծ մնալ անհարկի շքեղությունենրից և առաջնորդվել օրվա խորհրդի տրամաբանությամբ:


Կայքի բոլոր իրավունքները պաշտպանված են: Կայքից մեջբերումներ անելիս ակտիվ հղումը Anews.am-ի պարտադիր է: 

 

Հայտարարությունների և գովազդների բովանդակության համար կայքը պատասխանատվություն չի կրում:

ԼՐԱՏՎՈՒԹՅՈՒՆ
ԽՄԲԱԳՐՈՒԹՅՈՒՆ

© 2019 by Anews.am

Yerevan, Armenia