Search

Պատանի լրագրողների դպրոցը բացեց դռները


Պատանի լրագրողների դպրոցի դասընթացների նոր փուլի մեկնարկը տրվեց ապրիլի 23-ին: Դպրոցն ստեղծվել է 2015 թվականին. հնարավորություն է տալիս 12-ից 17 տարեկան պատանիներին բացահայտելու հեռուստատեսության աշխարհը՝ ուսումնասիրելով հաղորդավարական գործ, լրագրություն, օպերատրություն և մոնտաժ: Դասընթացները տևում են 3 ամիս և լավագույները մասնակցում են կենտրոն հեռուստաընկերությամբ հեռարձակվող «Օրագիր» լրատվական հաղորդաշարին: Պատանի լրագրողների դպրոց-ստուդիայում դասավանդում են փորձառու մասնագետներ Բաղդասար Մհերյանը, Արմինե Նալբանդյանը, ինչպես նաև վարպետության դասեր են վարում Արտակ Հերիքյանը, Արմեն Դուլյանը, Արտակ Ալեքսանյանը և այլ հայտնի ու փորձառու մասնագետներ, ովքեր իրենց գիտելիքներն են փոխանցում պատանիներին:

Բացման արարողության սկզբում ցուցադրվեց «Վան» հեռուստաստուդիայի մասին փոքրիկ հոլովակ՝ ներկայացնելով հեռուստաստուդիայի և դպրոցի արդեն ներկա նվաճումներն ու ապագա նախագծերը:

«Վան» հեռուստաստուդիան հիմնադրվել է 2005 թվականին Գյումրիում: Այն խիստ կարևորում էր հեռուստաեթերում մանկապատանեկան հաղորդաշարերի առկայությունը, ուստի իր գործունեության երկրորդ տարում ձեռնամուխ եղավ «Սուրհանդակ» մանկական լրատվական ծրագրի ստեղծմանը, որը եթեր հեռարձակվեց Շիրակի մարզային հեռուստատեսությամբ: Հարկ է նշել, որ պատանի հաղորդավարներից շատերն արդեն հանդես են գալիս մարզային և մայրաքաղաքային հեռուստաեթերներում: «Վան» հեռուստաստուդիայի գլխավոր նվաճումներն են 2008թ. նկարահանված «Ձեռքեր» փաստավավերագրական ֆիլմը` նվիրված Սպիտակի երկրաշարժին, ինչպես նաև «Վերածնունդ» ֆիլմաշարը՝ նվիրված Հայաստանի անկախության քսանամյակին: Այս նախագծերից հետո հեռուստաստուդիան տեղափոխվեց Երևան՝ շարունակելով նոր ծրագրերի ստեղծումը:

Բացման խոսքով հանդես եկավ Պատանի լրագրողի դպրոցի տնօրեն Բաղդասար Մհերյանը, ով մասնավորապես նշեց, որ «իրենք չեն հավակնում տալ լրագրողական կրթություն, որը ֆորմալ բնույթ է կրում, այլ սովորեցնում են պարմանիներին մտածել, ստեղծագործել և ծանոթանալ հեռուստատեսության գաղտնիքներին»: ԵՊՀ ռադիոհեռուստատեսային ժուռնալիստիկայի ամբիոնի դոցենտ, բ.գ.թ. Աստղիկ Ավետիսյանն էլ իր խոսքում նշեց, որ «դպրոցականների համար սա լայն հնարավորություն է ինքնադրսևորվելու ու ինքնահաստատվելու համար: Ուսուցման գործընթացում ծանոթանալով հեռուստատեսության աշխարհին, հասկանալով լրագրողական գործի նրբությունները՝ պատանիները փորձ ձեռք կբերեն և կդառնան մեդիագրագետ, ինչն այսօր կարևորվում է»: Ողջույնի խոսքով հանդես եկան նաև հայտնի լրագրող Արմեն Դուլյանն ու երգահան Արա Գևորգյանը: Վերջինս հորդորեց երեխաներին լրագրողի մասնագիտությունը ընտրելու դեպքում լինել «բարի լրագրող», քանի որ չար լրագրողը կարող է պատերազմ հրահրել՝ մաղթելով պատանի լրագրողներին միշտ դառնալ հաշտեցման աղբյուր: Իրենց շնորհակալական խոսքը հայտնեցին լրագրության դասերն ավարտած և արդեն «Օրագիր» լրատվականում գործունեություն ծավալած պատանիները:

Հանդիպումն ավարտվեց Արա Գևորգյանի՝ New Arena և «Վան» հեռուստաստուդիայի հետ համատեղ 2015թ. նկարահանված «Remember» տեսահոլովակի ցուցադրությամբ:


Կայքի բոլոր իրավունքները պաշտպանված են: Կայքից մեջբերումներ անելիս ակտիվ հղումը Anews.am-ի պարտադիր է: 

 

Հայտարարությունների և գովազդների բովանդակության համար կայքը պատասխանատվություն չի կրում:

ԼՐԱՏՎՈՒԹՅՈՒՆ
ԽՄԲԱԳՐՈՒԹՅՈՒՆ

© 2019 by Anews.am

Yerevan, Armenia