Ներգաղթյալների հոսքի պատճառով ԱՄՆ-Մեքսիկա սահմանին արտակարգ դրություն է հայտարարվել

Տեխասի Էլ Պասո քաղաքի ղեկավար Օսկար Լիզերը արտակարգ դրություն է հայտարարել ներգաղթյալների հոսքի պատճառով, որոնք վերջերս են ժամանել քաղաք եւ, նրա խոսքով, ապրում են ոչ անվտանգ պայմաններում։ Քաղաքապետը, ով նախկինում հրաժարվում էր արտակարգ դրություն հայտարարելուց, ասել է, որ հարյուրավոր միգրանտներ գտնվում են փողոցում՝ անապահով պայմաններում, քանի որ ջերմաստիճանը սկսում է իջնել, եւ իրավիճակը կարող է շատ ավելի վատթարանալ, երբ չորեքշաբթի օրը Թրամփի սահմանային քաղաքականությունը չեղարկվի, ինչը կհանգեցնի միգրանտների թվի աճին։ «Մենք գիտենք, որ չորեքշաբթի օրը ներհոսքն անհավատալի կլինի», - ասել է քաղաքապետը մամուլի ասուլիսի ժամանակ՝ հավելելով, որ որոշ պաշտոնյաների գնահատմամբ՝ դեկտեմբերի 21-ից հետո ժամանող միգրանտների թիվը կարող է ավելի քան կրկնապատկվել։ «Հաշվի առնելով այս բոլոր գործոնները՝ մենք զգացինք, որ այսօր ճիշտ ժամանակն է արտակարգ դրություն հայտարարելու համար»,- հավելել է նա։ Այս շաբաթվա սկզբին սահմանապահ ծառայության բարձրաստիճան պաշտոնյան ասել էր, որ շաբաթավերջին ավելի քան 2,400 միգրանտներ հատել են ԱՄՆ-ի սահմանը Էլ Պասո շրջանում՝ այդ թիվը որակելով որպես «անօրինական սահմանի հատումների լուրջ աճ» տարածքում: Քանի որ այդ թվերն աճում են, եւ տարածաշրջանում ռեսուրսներն արդեն իսկ լարված են, չորեքշաբթի օրը դատարանի վճիռով ուժի մեջ կմտնի 42-րդ օրենքը , մի քաղաքականություն, որը Covid-19 համաճարակի սկզբից ի վեր պաշտոնյաներին թույլ է տվել մերժել հարավային սահմանին մոտեցող միգրանտներին: Այս ժամկետի պատճառով դաշնային պաշտոնյաներն ակնկալում են սահմանը հատողների թվի հետագա աճ, հայտնում է CNN-ը։