Մոլերն ու առևտրի կենտրոնները բարձր ռիսկային օբյեկտներ են․ ԱԻՆ ղեկավար

Արտակարգ իրավիճակների նախարարության համար մոլերն ու առեւտրի կենտրոնները բարձր ռիսկային օբյեկտներ են։ Այս մասին «Ազատություն» ռադիոկայանի առցանց ասուլիսի ժամանակ ասաց ԱԻՆ ղեկավար Արմեն Փամբուխչյանը՝ պատասխանելով հարցին, թե արդյոք «Սուրմալու» առեւտրի կենտրոնում տեղի ունեցած ողբերգությունից հետո նման օբյեկտներում լրացուցիչ ստուգումներ են իրականացվում։

Նրա խոսքով, ԱԻՆ-ը ծրագրեր ունի տարբեր սցենարներով միջադեպերի համար։ Սակայն մնացած հարցերին կպատասխանեն տեսչական մարմինները։

«Սուրմալու» առեւտրի կենտրոնի շենքի հետագա ճակատագրի մասին հարցին նախարարը պատասխանեց, որ հենասյուները բավական ամուր են, սակայն պատերը «հեռացել են» հենասյուներից, ուստի, ԱԻՆ-ի գնահատմամբ, շենքի հետագա շահագործումը նպատակահարմար չէ, այն պետք է ապամոնտաժվի։