Մեծ Բրիտանիան սգի մեջ է Նորին Մեծություն թագուհի Եղիսաբեթ II-ի մահից հետո
Մեծ Բրիտանիայի թագուհի Եղիսաբեթ II-ի մահվան լուրից հետո Բուքինգհեմյան պալատի մոտ մարդկանց հոծ բազմություն է հավաքվել, հայտնում է BBC-ն։
«Ես հենց նոր Բուքինգհեմյան պալատի մոտ ծափեր լսեցի: Այնքան աներեւակայելի հուզիչ էր, քանի որ առաջիկա օրերին մենք կտեսնենք շատ ձեւականություններ, կտեսնենք շատ տխրություն, շատ արարողություններ: Բայց հենց այս փոքրիկ պահերը, որ կտեսնեք, կստիպեն մարդկանց հասկանալ, թե ինչ նշանակություն ուներ այս թագուհին մեզ համար»,- հայտնում է Sky News-ի թղթակից Մարկ Օսթինը։
«Նա գեղեցիկ թագուհի էր, եւ նրան շատ կկարոտեն», - ասում է լոնդոնցին, նկարագրելով թագուհուն մեկ բառով՝ «Դիմացկուն»:
«Ես ամբողջովին դատարկված եմ։ Նա մարմնավորում է բրիտանական ոգին»,- ասել է Սաութհեմփթոնից 23-ամյա բրիտանուհին։
Երբ Բալմորալում Նորին Մեծություն Թագուհու մահվան լուրը հայտնի է դարձել, մոտակա Բալաթեր գյուղը լռել է։ Միակ ձայնը գյուղի կենտրոնում գտնվող Գլենվիկ եկեղեցու զանգերի ղողանջն է եղել։ Անցորդները կանգ են առել եւ գլուխները խոնարհել՝ որպես հարգանքի տուրք։
Առաջատար երկաթուղային արհմիությունը դադարեցրել է հաջորդ շաբաթ նախատեսված գործադուլները՝ թագուհու մահվան պատճառով: Տրանսպորտի աշխատողների ասոցիացիան նույնպես չեղարկել է ծրագրված գործադուլները։
Դրոշներն իջեցվել են ողջ երկրում՝ որպես հարգանքի տուրք Բրիտանիայի ամենատարեց միապետին:
Բուքինգհեմյան պալատը, Վինձորի ամրոցը, խորհրդարանի շենքերը եւ Դաունինգ սթրիթ 10-ը իջեցրել են իրենց դրոշները:
Վինձորում իջեցված դրոշի ֆոնին երկնքում ծիածան է փայլատակել։
Ծաղիկներ են դրվում Բուքինգհեմյան պալատի շուրջը, քանի որ հասարակության անդամները հարգանքի տուրք են մատուցում թագուհուն:
Բուքինգհեմյան պալատի երկաթյա դարպասները զարդարված են սգավորների կողմից դրված տասնյակ գունավոր ծաղկեփնջերով։ Գրառումներից մեկում ասվում է. «Դու մեզ հետ էիր ավելի երկար, քան մենք արժանի էինք քեզ»։
Անգլիկան եկեղեցին հայտարարել է, որ վաղը եկեղեցական զանգերը կհնչեն ամբողջ Անգլիայում։
Եկեղեցական ժամհարների կենտրոնական ղեկավարությունը խորհուրդ է տվել զանգակատան կենտրոնական խորհրդի ղեկավարությունը խորհուրդ է տվել վաղը կեսօրին մեկ ժամ հնչեցնել զանգերը։
תגובות