Ճապոնիայի կայսրը եւ կայսրուհին մեկնել են Մեծ Բրիտանիայի թագուհու հուղարկավորությանը

Ճապոնիայի կայսր Նարուհիտոն եւ կայսրուհի Մասակոն շաբաթ օրը մեկնել են Մեծ Բրիտանիա՝ Եղիսաբեթ Երկրորդ թագուհու հուղարկավորությանը մասնակցելու համար, հաղորդում է AP-ն: Թագուհու հուղարկավորությանը մասնակցելու կայսրի եւ կայսրուհու որոշումն ընդգծում է թագավորական ընտանիքների միջեւ կարեւորությունն ու խորը կապը: Ավանդաբար ճապոնացի կայսրերը հուղարկավորություններին չեն մասնակցում, բացառությամբ իրենց ծնողների՝ սինտո կրոնի վրա հիմնված մշակութային համոզմունքների պատճառով, որոնք մահն անմաքուր են համարում: Նախկին կայսր Ակիհիտոն՝ որպես թագաժառանգ, մասնակցել էր թագուհու թագադրմանը 1953-ին եւ նրա ադամանդե հոբելյանին՝ 2012-ին։ Եղիսաբեթ թագուհին այցելել էր Ճապոնիա 1975-ին։ Եղիսաբեթ Երկրորդ թագուհու պետական ​​հուղարկավորությունը տեղի կունենա սեպտեմբերի 19-ին։ Թագուհին մահացել էր սեպտեմբերի 8-ին 96 տարեկանում։ Նա երկիրը ղեկավարել է 70 տարի։