Ղրղզստանի նախագահը կոչ է արել Հայաստանին եւ Ադրբեջանին հակամարտությունը լուծել խաղաղ ճանապարհով

Ղրղզստանի նախագահ Սադիր Ջապարովը կոչ է արել Հայաստանին եւ Ադրբեջանին հակամարտությունը լուծել խաղաղ ճանապարհով, հայտնել են պետության ղեկավարի մամուլի ծառայությունից։ Հաղորդվում է, որ նախօրեին երկրի ղեկավարը մասնակցել է Հավաքական անվտանգության պայմանագրի կազմակերպության (ՀԱՊԿ) Հավաքական անվտանգության խորհրդի արտահերթ նիստին տեսակոնֆերանսի ձեւով, որը տեղի է ունեցել հայկական կողմի նախաձեռնությամբ եւ նվիրված էր հայ-ադրբեջանական սահմանին տիրող իրավիճակին։ «Պետության ղեկավարը նշել է, որ Ղրղզստանը չափազանց մտահոգված է իրավիճակի սրմամբ երկու բարեկամ պետությունների սահմանին։ Նախագահ Սադիր Ջապարովն ընդգծել է իրավիճակը բացառապես քաղաքական եւ դիվանագիտական ​​միջոցներով կարգավորելու անհրաժեշտությունը եւ հույս հայտնել, որ երկու կողմերը կշարունակեն զերծ մնալ ուժի կիրառումից եւ բոլոր տարաձայնությունները կլուծեն խաղաղ ճանապարհով՝ Հայաստանի եւ Ադրբեջանի միջեւ վստահության ամրապնդման միջոցների հիման վրա»,- ասել է մամուլի ծառայության ներկայացուցիչը։