Կառավարությունը 2 մլրդ դրամ կհատկացնի ղարաբաղցի փախստականների աջակցության ծրագրին

Հայաստանի կառավարությունը 2023թ. մտադիր է պետական բյուջեից 2 մլրդ դրամ հատկացնել Լեռնային Ղարաբաղի Հանրապետության որոշ շրջաններից հարկադրաբար տեղահանված ընտանիքներին՝ բնակարան ձեռք բերելու համար։ Այս մասին Ազգային ժողովում, խորհրդարանական մշտական հանձնաժողովների համատեղ նիստում, 2023թ. պետական բյուջեի նախագծի քննարկման ժամանակ, նոյեմբերի 4-ին ասել է  հանրապետության աշխատանքի եւ սոցիալական հարցերի նախարար Նարեկ Մկրտչյանը։

Ծրագիրը, մասնավորապես,  նրանց թույլ կտա ձեռք բերել բնակելի անշարժ գույք կամ կառուցել անհատական տուն։ Նա նաեւ հիշեցրել է, որ 2022թ. հոկտեմբերին կառավարությունը կատարելագործել է առկա որոշումը, որի համաձայն՝ տեղահանվածի ընտանիքը սահմանամերձ գյուղում անշարժ գույք գնելու կամ կառուցելու դեպքում կարող է լրացուցիչ աջակցություն ստանալ։ Մասնավորապես, գնելու դեպքում հիպոթեկային վարկի հիմնական գումարի մարման համար կտրամադրվի 14 մլն դրամ, իսկ կառուցելու դեպքում՝ 16 մլն դրամ։ «Մտցված փոփոխությունների արդյունքում գումարը, որը գանձվելու է գնման կամ կառուցման դեպքում սեփականության իրավունքների գրանցման համար, նույնպես կսուբսիդավորվի»,- ասել է նախարարը։

Ծրագրի շահառուներ կարող են դառնալ. ա) ԼՂՀ-ի որոշ շրջաններում ապրած ընտանիքները (2020թ. սեպտեմբերի 27-ի դրությամբ); բ) ԼՂՀ-ում գրանցված քաղաքացիները, որոնք հանրապետության տարածքում ապրել են վերջին երեք ամիսներից ոչ պակաս; գ) անձինք, որոնք հանրապետության տարածքում ապրել են վերջին երեք տարիներին եւ որոնք հարկադրված են եղել տեղափոխվել 2020թ. սեպտեմբերի 27-ին Ադրբեջանի սանձազերծած պատերազմի հետեւանքով, եւ այլն։