Լիզ Թրասը հրաժարական չի տա

Մեծ Բրիտանիայի վարչապետ Լիզ Թրասը չի պատրաստվում հրաժարական տալ։ Այս մասին հայտարարել է նրա ներկայացուցիչը, գրում է Reuters-ը։

Ինքը՝ Թրասը, նախկինում հայտարարել է, որ «մարտնչող» է, այլ ոչ թե «վախկոտ»։

Թրասը փորձում է աջակցություն ստանալ Պահպանողական կուսակցության ներսում այն ​​բանից հետո, երբ ստիպված եղավ հրաժարվել հարկերի զանգվածային կրճատման ծրագրից։

Նա խոստովանել է, որ իր արմատական ​​տնտեսական ծրագրերը «շատ հեռուն են գնացել եւ շատ արագ»:

Սոցհարցումները ցույց են տալիս, որ պահպանողականները մոտ 30 կետով զիջում են հիմնական ընդդիմադիր Լեյբորիստական ​​կուսակցությանը, իսկ Թրասի վարկանիշն աղետալի է:

«Ես շատ հստակ ասել եմ, որ ցավում եմ եւ սխալներ եմ թույլ տվել»,-ասել է նա խորհրդարանում։

«Մենք ականատես եղանք գրեթե այն ամենի շրջադարձին, ինչի մասին նա խոստանում էր քարոզարշավի ընթացքում: Կարծում եմ՝ մեզանից շատերը հարց են տալիս՝ ինչի՞ն է հավատում Թրասը եւ ո՞ւմ է պաշտպանում»,-Times Radio-ին ասել է պահպանողական պատգամավոր Սթիվ Դաբլը։