Search

Երիտասարդական քաղաքականությունը հետընթաց է գրանցել. Ատոմ Մխիթարյան


Հայաստանի ամենամեծ երիտասարդական կազմակերպության՝ Երիտասարդական ակումբների դաշնության նախագահ Ատոմ Մխիթարյանի ուղերձը երիտասարդության միջազգային օրվա առթիվ՝

«Սիրելի՛ երիտասարդներ,

Ի սրտե շնորհավորում եմ բոլորիդ Երիտասարդության միջազգային օրվա առթիվ: Երկու տարի առաջ ձեր ոչ ստանդարտ, իսկական երիտասարդական մտածողության ու գործելակերպի արդյունքում դուք կարողացաք էական փոփոխություններ բերել Հայաստանի հասարակական կյանք: Սակայն, ցավոք, դա որևէ կերպ չանդրադարձավ երիտասարդական քաղաքականությանը, այն նույնիսկ հետընթաց գրանցեց: Երիտասարդների մասնակցությունը տարբեր մակարդակներում որոշումների կայացման գործընթացներում նվազագույնի է հասել, երիտասարդների հիմնախնդիրները նույնն են մնացել. գործազրկություն, որակյալ, արդիական կրթություն ստանալու ու ինքնադրսևորման հնարավորությունների պակաս, որոնք առկա համավարակի պայմաններում ավելի են խորացել: Որևէ կերպ չեն խրախուսվում երիտասարդական նախաձեռնությունները, տեղական ծրագրերը, սահմանափակված է շարժունությունը: Հիշե՛ք, միայն ձեր ընդհանրական ձգտումներով ու հաստատակամությամբ է պայմանավորված մեր պետության ու ազգի վաղվա օրը: Քանի որ օգոստոսի 11-ին նշվում է Նավասարդը, ապա շնորհավորելով բոլորիս, մաղթում եմ լինել համերաշխ ու կառուցողական, հայկական Նոր տարին սկսել նոր նպատակներով, գաղափարներով և գործերով: Հաջողություն եմ մաղթում ձեզ բոլոր նախաձեռնություններում՝ ի շահ մեր ժողովրդի:


1999 թ. դեկտեմբերի 17-ին ՄԱԿ-ի Գլխավոր ասամբլեայի որոշմամբ օգոստոսի 12-ը հռչակվեց Երիտասարդության միջազգային օր։ Այն ընդունվել է 1998 թ. օգոստոսի 12-ին Լիսաբոնում անցկացված երիտասարդության հարցերով նախարարների համաշխարհային խորհրդաժողովի առաջարկությամբ։ Տոնը հռչակվել է երիտասարդությանն ուղղված գործողությունների համաշխարհային ծրագրի մասին երիտասարդության իրազեկության բարձրացմանը նպաստելու նպատակով:

***

Երիտասարդական ակումբների դաշնությունը հիմնադրվել է 1999 թ.-ին։ Կազմակերպության ակունքներում է եղել ՀՀ առաջին երիտասարդական կազմակերպությունը` Երիտասարդական ակադեմիան (ԵրԱԿ)։ Այսօր ԵԱԴ-ը միավորում է ավելի քան 100 երիտասարդական մասնագիտական և տարածքային ակումբներ, կենտրոններ և կազմակերպություններ՝ դառնալով Հայաստանի ամենամեծ երիտասարդական կառույցը։


Երիտասարդական ակումբների դաշնություն

Կայքի բոլոր իրավունքները պաշտպանված են: Կայքից մեջբերումներ անելիս ակտիվ հղումը Anews.am-ի պարտադիր է: 

 

Հայտարարությունների և գովազդների բովանդակության համար կայքը պատասխանատվություն չի կրում:

ԼՐԱՏՎՈՒԹՅՈՒՆ
ԽՄԲԱԳՐՈՒԹՅՈՒՆ

© 2019 by Anews.am

Yerevan, Armenia