ԵԱՏՄ-ի երկրներում կայուն աճի հնարավորությունները քիչ են. ռուս փորձագետ
- Anews
- Nov 17, 2022
- 1 min read
Կայուն աճի հնարավորությունները Եվրասիական տնտեսական միությունում շատ քիչ են։ Այս մասին «Եվրասիական տնտեսական միության տնտեսական անվտանգությունը եւ կայունությունը. պետության եւ բիզնեսի հնարավորությունները» միջազգային համաժողովում, որն ընթանում է Երեւանում նոյեմբերի 17-ին, ասել է Ռուսաստանի ռազմավարական նախաձեռնությունների գործակալության գլխավոր տնօրենի խորհրդական Անտոն Մոսկալենկովը։ Ներկա ճգնաժամը, նրա գնահատմամբ, կարելի կլինի հաղթահարել մի քանի տարի հետո, բայց ԵԱՏՄ-ի երկրներում այն ավելի խոր կլինի, քան այլ երկրներում։ «Հատուկ ռազմական գործողությունն Ուկրաինայում կազդի եվրասիական ինտեգրման վրա, բայց գլոբալ բնույթ կունենա»,- ընդգծել է նա։ Մոսկալենկովն ավելացրել է, որ այս տարվա աշխարհաքաղաքական իրադարձությունների սթրես-թեստը Ռուսաստանի եւ սահմանակից երկրների տնտեսություններն անցել են։ Փորձագետը միաժամանակ նշել է, որ ներկա գնաճն ամբողջ աշխարհում հենվում է պարենային գնաճի վրա, ինչը հարվածում է ԵԱՏՄ-ի ոչ հարուստ երկրներին։ Հիշեցնենք, որ ԵԱՏՄ-ի կազմի մեջ են մտնում Հայաստանը, Բելառուսը, Ղազախստանը, Ղրղըզստանը եւ Ռուսաստանը։
Comments