Արցախի անկախության ճանաչման հարցը ՀՀ օրակարգում կա. Նիկոլ Փաշինյան
Հայաստանի Հանրապետության օրակարգում կա Արցախի անկախության ճանաչման հարցը: «Ալ Ջազիրա» արաբական հեռուստաալիքին տված հարցազրույցում այսպիսի հայտարարություն է արել ՀՀ վարչապետ Նիկոլ Փաշինյանը:
«Դա օրակարգի հարց է։ Որոշում կկայացվի, թե չի կայացվի՝ կախված բազմաթիվ գործոններից»,- ասաց Փաշինյանը:
ՀՀ վարչապետը նաև ասել է, որ միաժամանակ քննարկում է նաև Արցախի հետ ռազմաքաղաքական դաշինք կնքելու հնարավորությունը:
Փաշինյանի բնորոշմամբ` նման դաշինք այսօր էլ դե ֆակտո գոյություն ունի, և Հայաստանը Լեռնային Ղարաբաղի անվտանգության երաշխավորն է։
«Եվ մենք պետք է ապագա զարգացումները հաշվի առնենք` այս դրույթը մեր օրակարգում ունենալով։ Շատ կարևոր է արձանագրել, որ այս իրավիճակը տարածաշրջանում նոր ռազմաքաղաքական իրողություն է առաջացրել։ Տարիներ շարունակ ռազմատենչ հռետորաբանություն զարգացնելով՝ Ադրբեջանը հարձակվեց Լեռնային Ղարաբաղի վրա, և դա տեղի ունեցավ Թուրքիայի բացահայտ ռազմական աջակցությամբ։ Միջազգային մամուլում արդեն կան վկայություններ, որ Թուրքիայի վերահսկողության տակ գտնվող տարածքներից հավաքագրվում են վարձկաններ ու տեղափոխվում են մեր տարածաշրջան։ Այս պայմաններում մենք պետք է ուժեղացնենք մեր համագործակցությունը Լեռնային Ղարաբաղի հետ՝ անվտանգության ոլորտում»,- արձանագրեց ՀՀ վարչապետը: Հիշեցնենք` սեպտեմբերի 27-ին Հայաստանում ռազմական դրություն հայտարարելու հարցով ԱԺ–ում հրավիրված արտահերթ նիստում ՀՀ վարչապետ Նիկոլ Փաշինյանը հայտնել էր, որ Արցախի անկախության ճանաչումը Հայաստանի քաղաքական իշխանության օրակարգում կա:
Նա նաև հայտնել էր, որ ներկա պահին այդ հարցը չի քննարկվում, բայց և չէր բացառել, որ անհրաժեշտության դեպքում կքննարկվի:
Comentarios