ԱՄՆ-ում հայտարարել են, որ Պուտինի եւ Բայդենի շփումների համար պայմաններ չկան

Վաշինգտոնի վարչակազմում կարծում են, որ ներկայում ԱՄՆ նախագահ Ջո Բայդենի եւ Ռուսաստանի Դաշնության նախագահ Վլադիմիր Պուտինի շփման համար պայմաններ չկան։ Այս մասին հինգշաբթի լրագրողների հետ ավանդական ճեպազրույցում հայտարարել է Սպիտակ տան Ազգային անվտանգության խորհրդի ռազմավարական հաղորդակցությունների համակարգող Ջոն Քիրբին։ Նրան հարցրել են Պուտինի եւ Բայդենի շփումների հնարավորության մասին։ «Կարծում եմ, որ նախագահն արդեն ասել է այդ մասին մի քանի ամիս առաջ, երբ այստեղ էր [Ուկրաինայի] նախագահ [Վլադիմիր] Զելենսկին»,- պատասխանել է Քիրբին։ Նրա խոսքով՝ Բայդենն ավելի վաղ այսպիսի դիրքորոշում էր հայտնել. «Եթե Պուտինն իսկապես անկեղծ է եւ լրջորեն տրամադրված է հանդիպել եւ քննարկել խաղաղությունը, նախագահը կդիտարկի նրա հետ խոսելու հնարավորությունը»։ «Բայց այդ առումով որեւէ փոփոխություն չի եղել»,- կարծում է Ազգային անվտանգության խորհրդի աշխատակիցը։