Ականազերծողների խումբը Վարդավառ է նշել Հալեպում

Հուլիսի 24-ին Վարդավառի խորհրդի կապակցությամբ «Հումանիտար ականազերծման և փորձագիտական կենտրոն»-ի հումանիտար առաքելություն իրականացնող խումբն իր տեղակայման վայրում հյուրընկալել է Հալեպում հայ համայնքին պատկանող «Ազգային Պատսպարան» մանկատան սաներին։ Հումանիտար ականազերծման և փորձագիտական կենտրոնից հայտնում են, որ այցելության ընթացքում երեխաները ծանոթացել են մարդասիրական խմբի առօրյային, տեղակայման վայրին, որից հետո խմբի ներկայացուցիչները երեխաներին պատմել են Վարդավառ տոնի խորհրդի մասին, կազմակերպել են հյուրասիրություն։ Վարդավառ տոնի ժողովրդական սովորությանը համաձայն, որպես օրվա լավագույն ավարտ, երեխաները «խաղացել են ջրոցի»։ Մանկատան տնօրինությունն իր երախտիքի խոսքն է հայտնել «ՀԱՓԿ» ՊՈԱԿ-ի հումանիտար առաքելության խմբին երեխաների մասին հոգալու և նրանց օրը տոնական դարձնելու համար։