Ադրբեջանի ՊՆ-ն հայտնել է Արցախի ոստիկանների վրա հարձակման հետեւանքով երկու զոհի մասին

Ադրբեջանի ՊՆ-ն հրապարակել է՝ Արցախի ոստիկանության անձնագրային եւ վիզաների վարչության ծառայողների հերթապահ ավտոմեքենայի վրա հարձակման հետեւանքով մահացած երկու անձանց անունները։ «Մարտի 5-ին զոհվել են Ադրբեջանի բանակի զինծառայողներ Ալիբեյլի Շահրիյար Ռամիզ օղլուն եւ Հուսեյնով Էշգին Ջամիլ օղլուն», - ասվում է Ադրբեջանի պաշտպանության նախարարության տարածած հաղորդագրության տեքստում։ Հիշեցնենք, որ մարտի 5-ին՝ ժամը 10:00-ի սահմաններում, ադրբեջանական զինուժի դիվերսիոն խումբը Հայպալու կոչվող տարածքում կրակ է բացել Արցախի ոստիկանության անձնագրային եւ վիզաների վարչության հերթապահ ավտոմեքենայի վրա։ Դիվերսիոն ներթափանցման հետեւանքով զոհվել է ոստիկանության երեք աշխատակից՝ փոխգնդապետ Արմեն Բաբայանը, մայոր Դավիթ Դանիելյանը, լեյտենանտ Արարատ Գասպարյանը։ Մեկ այլ զինծառայող՝ լեյտենանտ Դավիթ Հովսեփյանը հրազենային վնասվածք է ստացել․ նրան վիրահատել են։